आदिवासी विद्यार्थ्यांचे आंदोलन लोकशाही मार्गाने व्हावे -महसूल मंत्री चंद्रशेखर बावनकुळे

 

 

नागपूर : गेल्यावेळी ही जागा आम्ही जिंकू शकलो नव्हतो. मात्र यावेळी महायुतीचे सर्व घटक पक्ष, कार्यकर्ते आणि पदाधिकारी एकजुटीने काम करत आहेत. तसेच नागपूर पदवीधर मतदारसंघातून महायुतीचे अधिकृत उमेदवार सुधाकर कोहळे यांनी उमेदवारी अर्ज दाखल केला आहे. त्यामुळे यावेळी कोहळे यांचा प्रचंड बहुमताने विजय होईल, असा विश्वास महसूलमंत्री चंद्रशेखर बावनकुळे यांनी व्यक्त केला. 

 

 

अनिल सोले य़ांच्याशी चर्चा करून त्यांची नाराजी दूर केली जाईल. ते आपला उमेदवारी अर्ज मागे घेतील, असा विश्वासही बावनकुळे यांनी व्यक्त केला. 

 

 

अमरावती विधानपरिषद मतदारसंघाबाबत महायुतीच्या बैठकीत चर्चा करण्यात आली, ही जागा शिवसेनेने लढवावी, असा विचार बैठकीत मांडण्यात आला आहे. मात्र याबाबतचा अंतिम निर्णय आणि अधिकृत घोषणा प्रदेश अध्यक्ष रवींद्र चव्हाण तसेच महायुतीतील संबंधित पक्षांचे अध्यक्ष संयुक्तपणे करतील, असे बावनकुळे यांनी स्पष्ट केले. (Sudhakar Kohale)

 

 

राज्यातील दुष्काळी परिस्थिती अत्यंत गंभीर आहे. सोयाबीन, मका आणि कापसाच्या पिकाचे मोठे नुकसान झाले आहे. रब्बीचे पीक घेणेही अवघड होण्याची शक्यता आहे. पुढील काळात चारा आणि पिण्याच्या पाण्याचा प्रश्न निर्माण होऊ शकतो. परिस्थितीचे गांभीर्य लक्षात घेऊन मुख्यमंत्री देवेंद्र फडणवीस यांनी शेतकऱ्यांना मदत करण्याच्या दृष्टीने विचार सुरू केला आहे. पीक विमा तसेच एसडीआरएफच्या माध्यमातून मिळणारी संपूर्ण मदत शेतकऱ्यांपर्यंत पोहोचविण्याचा प्रयत्न केला जाईल, असे त्यांनी सांगितले. 

 

 

दुष्काळाच्या पार्श्वभूमीवर चारा टंचाईचा प्रश्न निर्माण होऊ नये यासाठी नियोजन करण्यात येत आहे. ज्या ठिकाणी थोडा ओलावा उपलब्ध आहे, त्या ठिकाणी ‘माता जिजाऊ महिला सक्षमीकरण योजने’अंतर्गत चारा लागवडीला प्रोत्साहन देण्यात येत आहे. वैरण विकासाची कामे हाती घेण्यात आली आहेत. 

 

विदर्भात मोठ्या प्रमाणावर वनक्षेत्र आहे. या भागात बी-बियाणे उपलब्ध करून देऊन चारा निर्मिती करता येऊ शकते. यासाठी वन विभागाच्या अधिकाऱ्यांची बैठक घेण्यात आली असून आवश्यक निधी उपलब्ध करून देत वनक्षेत्रातूनही चारा उपलब्ध करण्याचे नियोजन करण्यात येत आहे.

 

 

शेतकऱ्यांसोबत केलेल्या जेवणाबाबत बावनकुळे म्हणाले की, हा कोणताही पूर्वनियोजित कार्यक्रम नव्हता. शेतकरी डबा घेऊन आले होते. आपण त्यांच्या भेटीसाठी गेल्यानंतर त्यांनी प्रेमाने डबा खाण्याची विनंती केली. त्यानंतर शेतकऱ्यांसोबत झुणका-भाकर आणि ठेचा खाल्ला.

दुष्काळाच्या संकटात शेतकरी दुःखी असला तरी त्याने आपले संस्कार आणि पाहुणचाराची परंपरा विसरलेली नाही, हे या प्रसंगातून दिसून आले, असे बावनकुळे म्हणाले.