कोकण विभाग रिक्षा टॅक्सी महासंघाच्या वतीने ठाणे जिल्हाधिकाऱ्यांना निवेदन; बेकायदेशीर बाईक, टॅक्सी सेवा बंद करण्याची मागणी!

 

 

 

कल्याण: ठाणे जिल्ह्यात रॅपिडो व इतर बाईक टॅक्सी सेवांच्या माध्यमातून सुरू असलेल्या कथित नियमबाह्य व्यवसायाची चौकशी करून संबंधित सेवा तातडीने बंद करण्याच्या मागणीसाठी कोकण विभाग रिक्षा टॅक्सी महासंघाच्या वतीने जिल्हाधिकारी, ठाणे यांना निवेदन सादर करण्यात आले. या निवेदनाद्वारे रिक्षा-टॅक्सी चालक-मालकांच्या रोजगाराचा प्रश्न, आर्थिक हितसंबंध तसेच बाईक टॅक्सी चालकांच्या कथित आर्थिक शोषणाचा मुद्दा प्रशासनासमोर मांडण्यात आला.

 

कोकण विभाग रिक्षा टॅक्सी महासंघ ही संघटना गेल्या ५० वर्षांहून अधिक काळ कोकण विभागातील रिक्षा-टॅक्सी चालक-मालकांच्या न्याय्य हक्कांसाठी कार्यरत असून, संघटनेच्या माध्यमातून हजारो चालक-मालकांच्या विविध प्रश्नांवर सातत्याने आवाज उठविण्यात येतो. कायद्याच्या चौकटीत व्यवसाय करणाऱ्या रिक्षा-टॅक्सी चालकांना न्याय मिळावा आणि त्यांच्या उदरनिर्वाहावर अन्यायकारक परिणाम होऊ नये, ही महासंघाची प्रमुख भूमिका आहे. (Thane Bike Taxi Ban Demand)

 

महासंघाच्या म्हणण्यानुसार, ठाणे जिल्ह्यात रिक्षा-टॅक्सी चालक-मालकांना विविध आर्थिक अडचणींचा सामना करावा लागत असताना रॅपिडो व इतर बाईक टॅक्सी सेवांमुळे पारंपरिक प्रवासी वाहतूक व्यवसायावर परिणाम होत आहे. संबंधित बाईक टॅक्सी सेवांची कायदेशीर वैधता, परवानगी, नियमांचे पालन आणि चालकांना मिळणारा मोबदला या सर्व बाबींची सक्षम यंत्रणेमार्फत सखोल चौकशी करण्यात यावी, अशी मागणी महासंघाने केली आहे. (Thane Bike Taxi Ban Demand)

 

पुणे जिल्ह्यात बाईक टॅक्सी सेवांसंदर्भात प्रशासनाने केलेल्या कारवाईचा व निर्णयांचा संदर्भ देत, ठाणे जिल्ह्यातही संबंधित सेवांच्या कायदेशीर स्थितीची पडताळणी करून नियमांचे उल्लंघन आढळल्यास कठोर कारवाई करण्यात यावी, अशी भूमिका महासंघाने निवेदनात मांडली आहे. (Thane Bike Taxi Ban Demand)

 

केवळ रिक्षा-टॅक्सी चालक-मालकांच्या रोजगाराचा प्रश्न नसून, बाईक टॅक्सी चालकांचे हित, प्रवाशांची सुरक्षितता आणि वाहतूक नियमांची अंमलबजावणी यांचाही हा महत्त्वाचा विषय आहे. त्यामुळे प्रशासनाने या प्रश्नाकडे गांभीर्याने लक्ष देऊन वस्तुस्थितीच्या आधारे योग्य तो निर्णय घ्यावा, अशी मागणी करण्यात आली. (Thane Bike Taxi Ban Demand)

 

यासंदर्भात सविस्तर चर्चा करण्यासाठी तसेच संबंधित कायदेशीर, आर्थिक व सामाजिक बाबींची माहिती सादर करण्यासाठी कोकण विभाग रिक्षा टॅक्सी महासंघाच्या शिष्टमंडळाला प्रत्यक्ष भेटीसाठी वेळ देण्यात यावी, अशी विनंतीही जिल्हाधिकाऱ्यांकडे करण्यात आली आहे. (Thane Bike Taxi Ban Demand)

 

ठाणे जिल्हा प्रशासनाने या निवेदनाची दखल घेऊन संबंधित विभागांची बैठक आयोजित करावी, बाईक टॅक्सी सेवांची कायदेशीर तपासणी करावी आणि नियमबाह्य सेवा आढळल्यास त्या बंद करण्यासाठी तातडीने कार्यवाही करावी, अशी अपेक्षा महासंघाने व्यक्त केली आहे. (Thane Bike Taxi Ban Demand)

 

 

“रिक्षा-टॅक्सी चालक-मालकांच्या न्याय्य हक्कांचे संरक्षण झाले पाहिजे. कोणत्याही प्रकारच्या नियमबाह्य प्रवासी वाहतुकीला प्रोत्साहन मिळता कामा नये. प्रशासनाने सर्व संबंधित बाबींची निष्पक्ष चौकशी करून कायद्यानुसार योग्य निर्णय घ्यावा. या प्रश्नावर महासंघ सातत्याने पाठपुरावा करणार आहे.” असे कोकण विभाग रिक्षा टॅक्सी महासंघाचे अध्यक्ष प्रणव प्रकाश पेणकर यांनी सांगितले. (Thane Bike Taxi Ban Demand)