हिंदू सणांमध्ये व्यत्यय आणण्याचा ‘इंडी’ आघाडीचा कट; व्यापाऱ्यांकडून सभा पुढे ढकलण्याची होती मागणी!

 

 

 

मुंबई (Vinod Bansal) : हिंदू सणांमध्ये व्यत्यय आणण्याचा आणि देशाच्या अर्थव्यवस्थेला नुकसान पोहोचवण्याचा कट इंडी आघाडी रचत असल्याचा आरोप विश्व हिंदू परिषदेचे राष्ट्रीय प्रवक्ते विनोद बन्सल यांनी मंगळवारी केला. दिल्लीतील व्यापाऱ्यांनी आवाहन करूनही काँग्रेससह विरोधी पक्षांनी १ नोव्हेंबर रोजी रामलीला मैदानावर होणारी आपली सभा पुढे ढकलण्यास नकार दिल्याबद्दल त्यांनी टीका केली.

 

मुख्य निवडणूक आयुक्त ज्ञानेश कुमार आणि मतदार याद्यांच्या विशेष सखोल पुनरीक्षणाला (एसआयआर) विरोध करण्यासाठी ही सभा आयोजित करण्यात आली आहे. मात्र, सणासुदीच्या काळातील खरेदी-विक्रीच्या हंगामात या सभेमुळे हिंदूंच्या सणांच्या उत्साहावर आणि व्यापाऱ्यांच्या व्यवसायावर परिणाम होऊ शकतो, असा दावा बन्सल यांनी समाजमाध्यमांवरील ‘एक्स’ या व्यासपीठावरील पोस्टमधून केला. 'आंदोलनांच्या नावाखाली हिंदूंचे सण आणि देशाच्या अर्थव्यवस्थेवर हल्ला करण्याचे कट रचण्यापासून ‘इंडी’ आघाडीच्या नेत्यांनी दूर राहावे,' असे बन्सल यांनी म्हटले आहे.  (Vinod Bansal)

 

व्यापार आणि उद्योग मंडळाने (सीटीआय) सभेची तारीख पुढे ढकलण्याची विनंती केली होती; मात्र ती फेटाळण्यात आल्याचा दावा त्यांनी केला. तसेच, १ नोव्हेंबर रोजी असलेल्या अहोई अष्टमी या सणाचाही त्यांनी उल्लेख केला. अन्य काही गटांकडून अशी विनंती आली असती, तर विरोधकांनी वेगळी भूमिका घेतली असती, असा आरोपही त्यांनी केला. १ नोव्हेंबर रोजीची सभा पुढे ढकलण्याची विनंती व्यापारी समुदायाकडून करण्यात आली होती; मात्र ती नाकारण्यात आली. अशी विनंती ‘जिहादीं’कडून आली असती, तर त्यांनी माफी मागण्यासाठी तत्काळ लोटांगण घातले असते आणि सभा लगेच रद्द केली असती! काँग्रेसी संस्कृतीचे हेच स्वरूप आहे. याच दिवशी अहोई अष्टमी आहे. मुलांचे कल्याण आणि दीर्घायुष्य यासाठी माता हे व्रत पाळतात,” असे बन्सल म्हणाले.  (Vinod Bansal)

  

काँग्रेस, कम्युनिस्ट आणि त्यांनी ‘जातीयवादी जिहादी’ असे संबोधलेल्या घटकांवर व्यापारी समुदाय आणि हिंदूंच्या सणांविरोधात एकत्रितपणे काम करत असल्याचा आरोपही बन्सल यांनी केला. “सावध राहा! काँग्रेसी, कम्युनिस्ट आणि जातीयवादी जिहादी यांचा समावेश असलेली ‘ट्रिपल सी’ टोळी सर्व बाजूंनी सापळे रचत आहे. व्यापाऱ्यांचा व्यवसाय उद्ध्वस्त करणे, हिंदूंच्या श्रद्धेवर आणि सणांच्या आनंदावर आघात करणे, तसेच देशाच्या अर्थव्यवस्थेचे नुकसान करणे, हा त्यांचा उद्देश आहे,” असे त्यांनी आपल्या पोस्टमध्ये म्हटले.  (Vinod Bansal)

 

दिवाळीसह प्रमुख हिंदू सणांच्या काळातील आनंदी वातावरण बिघडवण्याचे प्रयत्न केले जात असल्याचा आरोप करत बन्सल यांनी नागरिकांना कथित हिंदूविरोधी अजेंड्याबाबत सतर्क राहण्याचे आवाहन केले. देशातील सर्वांत मोठ्या सणांच्या आनंदावर आणि समृद्धीवर सावट आणण्याचे कट रचले जात आहेत. आधी नवरात्र आणि दसऱ्याच्या काळात, आता दिवाळीच्या वेळी असे प्रयत्न सुरू आहेत. देशातील नागरिकांनी, विशेषतः हिंदू समाजाने, सातत्याने हिंदूविरोधी अजेंडा राबवणाऱ्या व्यक्ती आणि संघटनांपासून सावध राहिले पाहिजे,” असे ते म्हणाले.  (Vinod Bansal)

 

इंडी’ आघाडीने हे लक्षात ठेवावे की, तुम्ही कितीही प्रयत्न केले, तरी हिंदू समाज योग्य वेळी हिंदू समाज आणि भारताच्या अर्थव्यवस्थेला हानी पोहोचवण्याच्या या दुष्ट कारस्थानांना निश्चितच प्रत्युत्तर देईल. तुमचे भारतविरोधी आणि हिंदूविरोधी कट कधीही यशस्वी होऊ दिले जाणार नाहीत,” असा इशाराही बन्सल यांनी दिला.  (Vinod Bansal)

 

 

व्यापार आणि उद्योग मंडळाने (सीटीआय) काही दिवसांपूर्वी लोकसभेतील विरोधी पक्षनेते राहुल गांधी यांना पत्र लिहून ‘व्होट बचाओ, देश बचाओ’ ही सभा १० नोव्हेंबरनंतर आयोजित करण्याची विनंती केली होती. सीटीआयचे अध्यक्ष बृजेश गोयल यांनी या पत्रात सणासुदीच्या काळातील वाढत्या व्यापाराचा उल्लेख केला होता. ६ नोव्हेंबर रोजी धनत्रयोदशी, ८ नोव्हेंबर रोजी दिवाळी आणि १० नोव्हेंबर रोजी भाऊबीज असल्याने व्यापाऱ्यांसाठी हा काळ अत्यंत महत्त्वाचा असल्याचे त्यांनी नमूद केले होते. दिल्लीमध्ये केवळ धनत्रयोदशीच्या दिवशी सुमारे २५ हजार कोटी रुपयांची उलाढाल होते, असा दावा व्यापारी संघटनेने केला. तसेच, मध्य दिल्लीतील रस्ते बंद करणे आणि वाहतुकीचे मार्ग बदलणे यांमुळे ऑक्टोबर महिन्यात व्यापाऱ्यांना आधीच सुमारे तीन हजार कोटी रुपयांचे नुकसान सहन करावे लागल्याचेही संघटनेने म्हटले. रामलीला मैदानाच्या पाच किलोमीटरच्या परिसरात घाऊक आणि किरकोळ व्यापाराची २० प्रमुख बाजारपेठा आहेत. सभेमुळे वाहतुकीचे मार्ग बदलणे, मेट्रो स्थानके बंद ठेवणे आणि ठिकठिकाणी बॅरिकेड्स लावणे यांसारख्या उपाययोजना कराव्या लागल्यास या बाजारपेठांतील व्यापारावर परिणाम होऊ शकतो, अशी भीती सीटीआयने व्यक्त केली. राजकीय पक्षांना सभा घेण्याचा अधिकार असल्याचे मान्य करतानाच, दिल्लीतील व्यापारी समुदायाच्या हिताचाही काँग्रेसने विचार करावा, असे आवाहन संघटनेने केले होते.  (Vinod Bansal)