पुण्यात रंगणार 'अलबत्या-गलबत्या’चे सलग ७ विश्वविक्रमी प्रयोग !

मुंबई - Albatya Galbatya Natakमराठी बालरंगभूमीवर आपल्या अनोख्या जादूने गेली पाच दशके प्रेक्षकांच्या मनावर अधिराज्य गाजवणारे अद्वैत थिएटर निर्मित ‘अलबत्या-गलबत्या’ हे लोकप्रिय बालनाट्य आता आणखी एका शिखर विश्वविक्रमाच्या दिशेने झेपावले आहे. येत्या १५ ऑक्टोबर रोजी पुण्यातील बालगंधर्व रंगमंदिरात या नाटकाचे सलग ७ प्रयोग रंगणार असून, या अनोख्या उपक्रमातून पुणे महानगरपालिकेच्या शाळांमधील हजारो मुलांना आनंदाची अविस्मरणीय सफर घडणार आहे. महाराष्ट्र राज्य सहकारी बँक, सर्वस्य प्रोडक्शन आणि अद्वैत थिएटर यांच्या पुढाकाराने तसेच पुणे महानगरपालिकेच्या सहकार्याने हा महत्त्वाकांक्षी उपक्रम साकारत आहे. बालरंगभूमीच्या इतिहासात नवा अध्याय लिहिणाऱ्या या शिखर विश्वविक्रमाकडे सध्या संपूर्ण रंगभूमीचे लक्ष लागले आहे.Albatya Galbatya Natak

अद्वैत थिएटर निर्मित आणि चिन्मय मांडलेकर दिग्दर्शित ‘अलबत्या-गलबत्या’ या नाटकाची सध्या हजाराव्या प्रयोगाकडे दमदार घोडदौड सुरू आहे. गमती-जमती, हशा, टाळ्या आणि शिट्ट्यांनी नाट्यगृह दणाणून सोडणारे हे बालनाट्य केवळ मुलांचेच नव्हे, तर त्यांच्या पालकांसह ज्येष्ठ आणि थोरामोठ्यांचेही भरभरून मनोरंजन करत आहे. दैनंदिन धावपळीच्या आणि ताणतणावाच्या आयुष्यातून काही क्षण मुक्त करत प्रेक्षकांना एका आनंदी, जादुई सफरीवर घेऊन जाण्याचे काम हे नाटक सातत्याने करत आहे.Albatya Galbatya Natak

ज्येष्ठ साहित्यिक रत्नाकर मतकरी यांच्या जादुई लेखणीतून तब्बल पाच दशकांपूर्वी जन्माला आलेल्या ‘अलबत्या-गलबत्या’ची मोहिनी आजही कायम आहे. काळ बदलला, पिढ्या बदलल्या, मनोरंजनाची माध्यमे बदलली; मात्र या नाटकाची लोकप्रियता आणि त्यातील जादू आजही तितकीच ताजी आहे.या नाटकाने आतापर्यंत ३६५ दिवसांत ३३३ प्रयोग हाऊसफुल्ल करण्याचा विक्रम नोंदवला आहे. याशिवाय एका दिवसात सलग ४, ५ आणि ६ प्रयोग सादर करण्याचा विक्रमही या नाटकाच्या नावावर आहे. आता सलग ७ प्रयोगांच्या शिखर विश्वविक्रमाची भर पडणार आहे.Albatya Galbatya Natak

‘अलबत्या-गलबत्या’च्या लोकप्रियतेत नाटकातील गाण्यांचा मोठा वाटा आहे. रत्नाकर मतकरी, चिन्मय मांडलेकर, समृद्धी पांडे, संचित गायकवाड आणि संस्कारी यांनी शब्दबद्ध केलेली ही गाणी अवधूत गुप्ते, वैशाली सामंत यांच्यासह बालदोस्तांनी आपल्या आवाजाने अधिक श्रवणीय आणि लोकप्रिय केली आहेत.Albatya Galbatya Natak

या उपक्रमामागे केवळ विश्वविक्रमाची नोंद करण्याचा हेतू नसून, पुणे महानगरपालिकेच्या शाळांमध्ये शिकणाऱ्या हजारो मुलांना दर्जेदार नाट्याचा आनंद देत त्यांच्या चेहऱ्यावर हास्य फुलवण्याचा मानस आहे. सामूहिक प्रयत्न, हितचिंतकांच्या शुभेच्छा आणि रंगभूमीवरील प्रेम यांच्या बळावर साकारला जाणारा हा आगळावेगळा सोहळा निश्चितच मराठी रंगभूमीच्या इतिहासात संस्मरणीय ठरणार आहे.Albatya Galbatya Natak