अमेरिकेत कार्यरत भारतीय आयटी कर्मचाऱ्यांच्या संरक्षणासाठी भारतीय मजदूर संघाची केंद्र सरकारकडे मागणी

मुंबई:( Indian IT workers in the US) भारतीय मजदूर संघाशी संलग्न असलेल्या ‘नॅशनल ऑर्गनायझेशन ऑफ डिजिटल एम्प्लॉइज’ (एनओडीई) या अखिल भारतीय औद्योगिक संघटनेने अमेरिकेत कार्यरत भारतीय आयटी, आयटीईएस आणि डिजिटल क्षेत्रातील व्यावसायिकांच्या संरक्षणासाठी योग्य उपाययोजना करण्याची मागणी केली आहे. यासंदर्भात संघटनेने केंद्रीय इलेक्ट्रॉनिक्स आणि माहिती तंत्रज्ञान, परराष्ट्र व्यवहार तसेच कामगार आणि रोजगार मंत्र्यांना निवेदन सादर केले आहे. अमेरिकेतील अलीकडील घडामोडींमुळे तेथे कार्यरत भारतीय व्यावसायिकांच्या नोकरी, स्थलांतरविषयक स्थिती, उत्पन्न, कौटुंबिक स्थैर्य आणि दीर्घकालीन करिअर नियोजनाबाबत अनिश्चितता निर्माण होऊ शकते, अशी चिंता एनओडीईने व्यक्त केली आहे.(Indian IT workers in the US)

 

भारतीय मजदूर संघाने केंद्र सरकारला अमेरिकेत कार्यरत भारतीय आयटी आणि आयटीईएस कंपन्यांना, तसेच भारतात कार्यालये असलेल्या अमेरिकेतील बहुराष्ट्रीय कंपन्यांना मार्गदर्शक सूचना जारी करण्याची विनंती केली आहे. कायदेशीर आणि व्यावहारिकदृष्ट्या शक्य असेल तेथे कर्मचाऱ्यांच्या नोकऱ्या टिकवून ठेवण्यासाठी प्रयत्न करण्याचे आवाहन कंपन्यांना करावे, अशी मागणी संघटनेने केली आहे. तसेच बाधित कर्मचाऱ्यांना सेवेत अनावश्यक खंड पडू न देता भारतातील योग्य पदांवर पुनर्नियुक्तीच्या संधी उपलब्ध करून देण्याचेही आवाहन करण्यात आले आहे.(Indian IT workers in the US)

 

बाधित कर्मचाऱ्यांची सेवाज्येष्ठता, लाभ आणि कायद्यानुसार मिळणारे हक्क अबाधित ठेवावेत, अशी मागणीही भारतीय मजदूर संघाने केली आहे. याशिवाय, संबंधित कर्मचारी आणि त्यांच्या कुटुंबीयांना तात्पुरती आर्थिक मदत व स्थलांतरासाठी सहाय्य देण्याचा विचार करावा, तसेच व्हिसा आणि कायदेशीर बाबींसाठी आवश्यक मदत उपलब्ध करून द्यावी, असे संघटनेने म्हटले आहे. त्याचबरोबर कर्मचाऱ्यांच्या तक्रारींचे निराकरण करण्यासाठी गोपनीय यंत्रणा उभारणे, तसेच बाधित व्यावसायिकांना नव्या कौशल्यांचे प्रशिक्षण, विद्यमान कौशल्यवृद्धी आणि पुनर्वसनासाठी मदत करणे, यावरही एनओडीईने भर दिला आहे.(Indian IT workers in the US)

 

बाधित कर्मचारी आणि नियोक्त्यांच्या मदतीसाठी केंद्र सरकारने स्वतंत्र नोडल हेल्पडेस्क स्थापन करण्याचा विचार करावा, अशी विनंतीही भारतीय मजदूर संघाने केली आहे. यासोबतच उद्योग क्षेत्रातील प्रतिनिधी आणि कामगार संघटनांशी सल्लामसलत करावी, तसेच भारतीय व्यावसायिकांच्या हितांचे संरक्षण, स्पष्ट नियम आणि योग्य कायदेशीर प्रक्रियेची खात्री करण्यासाठी अमेरिकेशी आवश्यक राजनैतिक चर्चा करावी, असेही संघटनेने सुचवले आहे. भारतीय डिजिटल क्षेत्रातील कर्मचारी आणि व्यावसायिकांची प्रतिष्ठा, उपजीविका आणि कायदेशीर हक्कांचे संरक्षण करण्यासाठी एनओडीई कटिबद्ध आहे. त्याचवेळी नियोक्ते आणि सरकारी यंत्रणांसोबत विधायक संवाद कायम ठेवण्याची आपली भूमिका संघटनेने पुन्हा स्पष्ट केली आहे.(Indian IT workers in the US)