यंदाचा MAMI मुंबई फिल्म फेस्टिव्हल रद्द! संचालकांनी सांगितलं कारण

मुंबई : दरवर्षी मुंबईत आयोजित करण्यात येणारा मामी मुंबई फिल्म फेस्टिव्हल २०२५ रद्द करण्यात आला आहे. यासंदर्भात आयोजकांनी सोमवारी २१ जुलैला घोषणा केली आहे. मुंबई अकॅडमी ऑफ मूव्हिंग इमेजेस म्हणजेच मामी या संस्थेचे संचालक शिवेंद्र सिंह डुंगरपूर यांनी ही माहिती दिली. त्यांनी सांगितले की, “फेस्टिव्हलचे पुन्हा नव्याने आयोजन होणार आहे. त्यासाठी वेळ लागेल. त्यामुळे २०२५ मध्ये फेस्टिव्हल होणार नाही.”

MAMI म्हणजे काय?

MAMI म्हणजे मुंबई अकॅडमी ऑफ मूव्हिंग इमेजेस. या संस्थेची स्थापना १९९७ मध्ये झाली. दरवर्षी मुंबईत आंतरराष्ट्रीय फिल्म फेस्टिव्हल आयोजित केला जातो. या महोत्सवात देशविदेशातील चित्रपट दाखवले जातात. मागील अनेक वर्षांपासून हा फेस्टिव्हल प्रकाशझोतात आलेला आहे.

View this post on Instagram

A post shared by MAMI Mumbai Film Festival (@mumbaifilmfestival)

यंदा का रद्द झाला?

शिवेंद्र सिंह डुंगरपूर यांनी स्पष्ट केले की, “हा महोत्सव आता नव्या दृष्टिकोनातून सादर होईल. नवीन टीम, नवीन विचार आणि नव्या कार्यक्रमांची आखणी करायची आहे. त्यासाठी २०२५ साल वगळण्यात आले आहे. फेस्टिव्हलचा खर्चही मोठा आहे. स्पॉन्सरशिप मिळवणे कठीण झाले आहे." तरी आयोजक म्हणाले, "पैसा ही एकमेव अडचण नाही. संस्था व्यवस्थापनात बदल आवश्यक आहे. २०२६ मध्ये नव्या रूपात फेस्टिव्हल आपल्या भेटीस येईल", असे आयोजकांनी सांगितले.

२०२६ मध्ये फेस्टिव्हल नव्या लोगो, थीम आणि उद्दिष्टांसह परत येईल. स्वतंत्र आणि प्रादेशिक चित्रपटांना अधिक संधी दिली जाईल. मुंबई शहराशी फेस्टिव्हलचे नाते अधिक घट्ट केले जाईल.फेस्टिव्हलचे आयोजन आता २०२६ मध्ये होणार आहे. तारीख आणि कार्यक्रमांची माहिती लवकरच जाहीर होईल. चित्रपटप्रेमींना आता नव्या रूपातील MAMI ची वाट पाहावी लागणार आहे.

चित्रपट दिग्दर्शकाचा संताप

चित्रपट दिग्दर्शक हंसल मेहता यांनी यावर नाराजी व्यक्त केली. ते म्हणाले, “मुंबई ही देशाची सिने राजधानी आहे. असे असतानाही आपण स्वतःचा एक फिल्म फेस्टिव्हल चालवू शकत नाही हे लाजिरवाणे आहे."