दिल्ली – मेरठ नमो भारत रेल्वेची यशस्वी चाचणी - रॅपिड रेल्वेद्वारे ८२ किमीचे अंतर एक तासापेक्षा कमी वेळात कापणे शक्य

नवी दिल्ली : राष्ट्रीय राजधानी क्षेत्र वाहतूक महामंडळाने (एनसीआरटीसी) दिल्लीच्या सराय काले खान आणि मेरठमधील मोदीपुरम दरम्यानच्या संपूर्ण नमो भारत कॉरिडॉरवर नमो भारत रेल्वेगाड्यांची नियोजित चाचणी यशस्वीरित्या पूर्ण केली आहे. यावेळी संपूर्ण ८२ किमीचा प्रवास एका तासापेक्षा कमी वेळात पूर्ण करण्यात आला आहे.

चाचणी दरम्यान, मेरठ मेट्रो गाड्या देखील नमो भारत गाड्यांसोबत धावल्या आणि या प्रणालीने यशस्वीरित्या त्यांच्या चाचण्या पूर्ण केल्या. दिल्ली, गाझियाबाद आणि मेरठ दरम्यान राबविल्या जाणाऱ्या भारतातील पहिल्या नमो भारत कॉरिडॉरमधील हा एक महत्त्वाचा टप्पा आहे. चाचणी दरम्यान, नमो भारत गाड्या ताशी १६० किमी या त्यांच्या कमाल ऑपरेशनल वेगाने ८२ किमीच्या पट्ट्यावरून अखंडपणे धावल्या. सराय काले खान आणि मोदीपुरम दरम्यानच्या प्रत्येक स्थानकावर गाड्या थांबल्या आणि एनसीआरटीसीने लक्ष्यित वेळापत्रकानुसार एका तासापेक्षा कमी वेळात अंतर पूर्ण केले.

सध्या, ११ स्थानकांसह कॉरिडॉरचा ५५ किमीचा भाग प्रवाशांसाठी आधीच कार्यरत आहे. उर्वरित भागांवर अंतिम काम आणि ट्रायल रन वेगाने सुरू आहेत - दिल्लीतील सराय काळे खान आणि न्यू अशोक नगर दरम्यानचा ४.५ किमीचा मार्ग आणि मेरठमधील मेरठ साउथ आणि मोदीपुरम दरम्यानचा अंदाजे २३ किमीचा मार्ग. एनसीआरटीसीने गाठलेला हा टप्पा नमो भारत कॉरिडॉरच्या पूर्ण कार्यान्वित होण्याच्या दिशेने प्रगतीचे महत्त्वपूर्ण सूचक आहे.

दरम्यान, मेरठ साउथ आणि मोदीपुरम डेपो दरम्यान मेरठ मेट्रोच्या चाचण्यादेखील वेगाने सुरू आहेत. मेरठ मेट्रोच्या २३ किमी विभागात १३ स्थानके आहेत, त्यापैकी १८ किमी मार्ग एलिव्हेटेड आणि ५ किमी भूमिगत आहे.