अबोल संवादाचा बादशाह...

कुणाल यांना लहानपणापासून लोकनृत्य आणि माईमची कला याबद्दल माहिती देखील होती आणि या दोन क्षेत्रात विशेषत: करिअर घडवायचे होते. मिस्टर बिन, चार्ली चॅपलिन काहीही न बोलता केवळ चेहर्‍यावरील हावभाव आणि शारिरिक हालचालींवरुन प्रेक्षकांचे निव्वळ मनोरंजन करतात, त्याला ‘माईम कला’ म्हणतात. एकही शब्द न उच्चारता प्रेक्षकांचे मनोरंजन करता येते, याबद्दल विशेष आकर्षण वाटल्यामुळे कुणाल यांनी ‘माईम आर्टिस्ट’ म्हणून आपली ओळख निर्माण करण्याचा निर्णय घेतला आणि त्यानुसार त्यांनी शिकवणी सुरु केली. जीवनात आर्थिक पाठबळ कुणी दिलं नाही तरी मानसिक आधार देणारी व्यक्ती ही फार महत्त्वाची. कोणत्याही क्षेत्रात पाय खेचणारे हजारो हात असतात, पण हात पुढे करुन आपल्याला शिखरावर नेणारे फार कमी असतात आणि कुणाल यांच्या जीवनात त्यापैकी दोन हात होते ते म्हणजे त्यांच्या शिक्षिका आणि त्यांची साथीदार. कुणाल यांना रुईया महाविद्यालयातील त्यांच्या एका शिक्षिकेने ‘माईम’ या कलेशी ओळख करुन देत ऑडिशन देण्याचा सल्ला देखील दिला.

 

‘माईम’ ही कला जरी फार जुनी असली तरी त्यातून कितीसे पैसे मिळणार? शिवाय कुणी आपल्याला विचारलं की पोटापाण्यासाठी काय करतो, तर काय उत्तरं द्यायची? या सगळ्या प्रश्नांची उत्तरेही कुणाल यांनी तयार ठेवली होती. कारण, त्यांना शेवटच्या श्वासापर्यंत ‘माईम’ ही कला अधिकाधिक लोकांपर्यंत पोहोचवायची आहे, हे त्यांनी मनाशी अगदी पक्क केलं होतं. या काळात त्यांच्या घरच्यांनी, ताही मित्र-मैत्रिणींनी मानसिक खच्चीकरणही केलं. ‘तोंडाला रंग लावून असा कोणता अभिनय करणार आहेस’ अशी बोचरी टीकाही त्यांना सहन करावी लागली. पण, कुणाल यांनी या टीकांकडे, टोमण्यांकडे दुर्लक्ष करुन ‘माईम’चे क्लासेस घेण्यास आणि ज्यांना ‘माईम’ शिकण्याची इच्छा आहे, त्यांना आपल्या ज्ञानातून ते देण्यास सुरुवात केली.सद्यस्थितीला कुणाल अंध लहान मुलांना ‘माईम’ची कला शिकवतात.

 त्याशिवाय ऑटिस्टक मुलं, अनाथ मुलं यांनाही ते ‘माईम’ची कला अवगत करुन देतात. याव्यतिरिक्त अभिनय क्षेत्रात देखील ‘माईम’ या कलेचे फार महत्त्व असल्याकारणाने ते कलाकारांना देखील ‘माईम’ शिकवतात. शिवाय देशभरातील विविध शाळा-कॉलेज आणि कॅफेमध्ये जाऊन ‘माईम’चे परफॉर्मन्स करत, या कलेविषयी अधिकाधिक लोकांपर्यंत माहिती पोहोचविण्याचे कामदेखील ते करतात. तसेच, कुणाल हे ‘वर्ल्ड माईम ऑर्गनायझेशन’चे सदस्यदेखील आहेत. त्यामुळे १५ वर्षांपेक्षा अधिक काळ ‘माईम’चे कलाउपासक कुणाल, या क्षेत्रात ज्यांना काम करण्याची ओढ आहे, त्यांना मार्गदर्शन देखील करतात. एकही संवाद किंवा वाक्य न बोलता, केवळ निर्व्याजपणे प्रेक्षकांचे मनोरंजन करणारे ‘माईम आर्टिस्ट’ कुणाल मोटलिंग यांना त्यांच्या पुढच्या वाटचालीसाठी ‘दै. मुंबई तरुण भारत’कडून खुप शुभेच्छा!