शिवशंभू विचार मंच आयोजित 'पुण्यश्लोक अहिल्यादेवी होळकर' व्याख्यान संपन्न
24 Dec 2024 14:02:47
मुंबई (विशेष प्रतिनिधी) : शिवशंभू विचार मंच (Shivshambhu Vichar Manch) कोकण प्रांत आयोजित "राजमाता पुण्यश्लोक अहिल्यादेवी होळकर यांच्यावर आधारित व्याख्यान आणि हेमाद्री अंक - १३ मोडी हस्तलिखिताचे प्रकाशन" शनिवार, दि. २१ डिसेंबर रोजी मराठी ग्रंथ संग्रहालय, ठाणे (पश्चिम) येथे संपन्न झाला. कार्यक्रमाचे प्रास्ताविक हेमाद्री अंकच्या सह संपादिका अश्विनी सुर्वे यांनी केले. सर्व उपस्थित मान्यवरांनी श्री छत्रपती शिवाजी महाराजांच्या प्रतिमेला पुष्प अर्पण करून दीप प्रज्वलन केले. यावेळी मंचावर शिव शंभू विचार मंच कोकण प्रांत संयोजक अभय जगताप, इतिहास अभ्यासक व मोडी लिपी प्रशिक्षक सुनील कदम उपस्थित होते.
दरम्यान अभय जगताप यांनी अहिल्यादेवीचें समाजकार्य असो, त्यांची प्रशासन व्यवस्था असो, त्यांनी बंद केलेली सती प्रथा असो, उद्ध्वस्त देवळांच्या पुनर्निर्माणाचे कार्य असो अशा अनेक छोट्या मोठ्या प्रसंगांचे जीवनदर्शन उलगडून सांगितले. पुण्यश्लोक अहिल्यादेवी होळकर यांच्या ३००व्या जयंतीनिमित्त हेमाद्री अंक - १३ मोडी हस्तलिखिताचे प्रकाशन दिलीप बलसेकर यांच्या हस्ते करण्यात आले. श्री बलसेकर यांनी त्यांच्या काही आठवणी व उद्बोधपर भाषण केले. आतापर्यंत जेवढी हेमाद्री अंकाची मोडी हस्तलिखिते प्रकाशित झाली ती सर्व मोडी हस्तलिखिते प्रदर्शनासाठी ठेवण्यात आली होती. अशाप्रकारे सुंदर व्याख्यान व मोडी हस्तलिखित प्रकाशनाचा कार्यक्रम संपन्न झाला.
