कल्याण पुर्वेतील अंजली हॉस्पिटलकडून तीन लाख ५८ हजारांची वीजचोरी

कल्याण : थकबाकीपोटी वीजपुरवठा खंडित केलेल्या कल्याण पूर्व विभागातील अंजली हॉस्पिटलकडून (जूने नाव- ऑक्झिलियम हॉस्पिटल) तब्बल तीन लाख ५८ हजार रुपयांची वीजचोरी झाल्याची घटना उघडकीस आली आहे. कल्याण पूर्व उपविभाग एक आणि भरारी पथकाने केलेल्या संयुक्त कार्यवाईत ही वीजचोरी उघड झाली असून चोरीच्या विजेचे देयक व दंडाची रक्कम भरण्याबाबत हॉस्पिटलला नोटिस बजावण्यात आली आहे. विहीत मुदतीत संबंधित रकमेचा भरणा न झाल्यास वीजचोरीचा गुन्हा दाखल होण्यासाठी आवश्यक फिर्याद देण्यात येणार आहे.

मुख्य अभियंता दिनेश अग्रवाल व अधीक्षक अभियंता सुनिल काकडे यांच्या मार्गदर्शनाखाली कल्याण पूर्व उपविभाग एकचे अतिरिक्त कार्यकारी अभियंता जितेंद्र प्रजापती, भरारी पथकाचे अतिरिक्त कार्यकारी अभियंता धनंजय सातपुते व अमोल उके, सहाय्यक सुरक्षा व अंमलबजवणी अधिकारी अतुल ओहळ, सहाय्यक अभियंता किरण इमाळी यांच्या पथकाने ही कामगिरी केली.