sahyadri tiger राधानगरीचा नवा वाघ 'रायबा'; सह्याद्रीतील नर वाघांच्या संख्येत वाढ

कोल्हापूर जिल्ह्यातील राधानगरी वन्यजीव अभयारण्य हे ३५१.१६ चौ.किमी क्षेत्रावर विस्तारलेले आहे. हा संपूर्ण परिसर जैवविविधतेचा हाॅटस्पाॅट आहे. सह्याद्री-कोकण वन्यजीव भ्रमणमार्गामध्ये व्याघ्र स्थलांतराच्या दृष्टीने राधानगरी अभयारण्य महत्त्वाची भूमिका बजावते. कारण, दक्षिणेकडून तिलारी-आंबोलीमार्गे स्थलांतर करुन येणारे वाघ हे राधानगरी अभयारण्यात स्थिरावतात आणि कालांतराने सह्याद्री व्याघ्र प्रकल्पाकडे मार्गस्थ होतात. सध्या सह्याद्री व्याघ्र प्रकल्पात असलेला एसटीआर टी-०२ म्हणजे सुभेदार हा वाघ देखील राधानगरीत वर्षभर राहिला होता. राधानगरीमधूनच त्याची प्रथम नोंद करण्यात आली. त्यानंतर हा वाघ सह्याद्री व्याघ्र प्रकल्पात येऊन याठिकाणी स्थिरावला. सुभेदारनंतर आता पुन्हा एकदा राधानगरी वन्यजीव अभयारण्यामधून नव्या वाघाची अधिकृत नोंद करण्यात आली. साधारण चार ते पाच वर्षांच्या या नर वाघाचे छायाचित्र डिसेंबर महिन्यात राधानगरी अभयारण्यात टिपण्यात आले होते. तेव्हापासून हा वाघ अभयारण्यात ठिय्या मांडून आहे.

 

 

राधानगरीत वास्तव्यास असणाऱ्या नर वाघाची यापूर्वी कोणत्याही प्रदेशामधून नोंद नाही. सिंधुदुर्ग तसेच कर्नाटकातील काली व्याघ्र प्रकल्पात अधिवास असणाऱ्या वाघांच्या छायाचित्रांची तुलना या वाघासोबत करण्यात आली. मात्र, कोणतीच छायाचित्र जुळली नाही. त्यामुळे या वाघाला एसटीआर टी-०८ असा सांकेतिक क्रमांक देण्यात आला असून यापुढे सह्याद्री व्याघ्र प्रकल्पातील एक वाघ म्हणूनच ओळखला जाईल. - तुषार चव्हाण, क्षेत्र संचालक, सह्याद्री व्याघ्र प्रकल्प.