Bajrang Dal : बजरंग दलाची तुलना पीएफआय सोबत केल्याने काँग्रेस नेत्यांच्या अडचणीत वाढ
06-Jan-2026
Total Views |
मुंबई : (Bajrang Dal) काँग्रेसने २०२३ च्या कर्नाटक विधानसभा निवडणुकीच्या जाहीरनाम्यात बजरंग दलावर बंदी घालण्याचे आश्वासन दिले होते. काँग्रेसने बदरंग दलाला बदनाम करण्याच्या दुर्भावनापूर्ण हेतूने असे आश्वासन दिल्याचे आरोप करण्यात आले होते. या आरोपांची चौकशी करण्याचे निर्देश मुंबईतील एका न्यायालयाने पोलिसांना दिले. (Bajrang Dal)
मुंबईतील बजरंग दल कार्यकर्ते वशिष्ठ नारायण बबन चौधरी यांनी अधिवक्ता संतोष दुबे यांच्यामार्फत तक्रार दाखल केली होती. या तक्रारीत असा आरोप करण्यात आला आहे की, काँग्रेसने जाणीवपूर्वक बजरंग दलाची तुलना बंदी घालण्यात आलेली दहशतवादी संघटना पॉप्युलर फ्रंट ऑफ इंडिया (PFI) शी केली आहे. यामुळे संघटनेच्या प्रतिमेला गंभीर धक्का बसला असून समाजात संघटनेची बदनामी करण्याचा प्रयत्न करण्यात आला आहे. (Bajrang Dal)
हेही वाचा : Santosh Dhuri BMC Election 2026: राज ठाकरेंच्या शिलेदाराने सोडली साथ; संतोष धुरी यांचा भाजपमध्ये प्रवेश
या तक्रारीत प्रामुख्याने काँग्रेसच्या मल्लिकार्जुन खर्गे (राष्ट्रीय अध्यक्ष, काँग्रेस), सिद्धरामय्या (मुख्यमंत्री, कर्नाटक) आणि डी. के. शिवकुमार (उपमुख्यमंत्री, कर्नाटक) या प्रमुख नेत्यांची नावे आहेत. या प्रकरणी न्यायालयाने पोलिसांना भारतीय दंड संहिता (IPC) कलम ४९९ आणि ५०० (मानहानी व मानहानीसाठी शिक्षा) अंतर्गत तपास करून अहवाल सादर करण्याचे आदेश दिले आहेत. (Bajrang Dal)
भावना दुखावणारे कृत्य
एका राष्ट्रवादी संघटनेची तुलना दहशतवादी संघटनेशी करणे हे केवळ अपमानास्पदच नाही, तर कोट्यवधी कार्यकर्त्यांच्या भावना दुखावणारे कृत्य आहे.
- वशिष्ठ नारायण बबन चौधरी, तक्रारदार
चारूदत्त टिळेकर
बारामती येथील तुळजाराम चतुरचंद महाविद्यालयात वाणिज्य विषयामध्ये पदवीचे शिक्षण. पुण्यातील रानडे इन्स्टिट्यूट येथून संज्ञापण आणि वृत्तपत्रविद्येमध्ये पदव्युत्तर पदवी. अनेक राज्यस्तरीय वक्तृत्व स्पर्धांमध्ये सहभाग. रानडे इन्स्टिट्यूट येथे 'पश्चिम महाराष्ट्रातील वक्तृत्व स्पर्धांची परंपरा, समस्या आणि परिणाम' या विषयात सखोल अहवाल सादर. सध्या मुंबई तरुण भारत येथे पत्रकार म्हणून कार्यरत.