उद्धव ठाकरेंचे आरोप म्हणजे मतदानाला स्पीडब्रेकर; मंत्री आशिष शेलार

 

मुंबई : ( Ashish Shelar Criticises Uddhav Thackeray ) मतदान यंत्रणा आणि लोकशाहीवर विश्वास ठेवून मतदार मतदान करत असताना हा गतीरोध का? उद्धव ठाकरे यांची पत्रकार परिषद आणि त्यांनी केलेले आरोप हे निवडणूक यंत्रणा, निवडणूकीत सहभागी होणारे अधिकारी आणि मतदार याला स्पीडब्रेकर आहे का? ते पत्रकार परिषद का घेतात? यावर निवडणूक आयोगाने लक्ष ठेवले पाहिजे, अशी मागणी सांस्कृतिक कार्यमंत्री आशिष शेलार यांनी केली.

 

मतदानानंतर बोटावरील शाई पुसली जात असल्याच्या मुद्यावरून उद्धव ठाकरे यांनी पत्रकार परिषद घेतली. यावर उत्तर देताना मंत्री आशिष शेलार म्हणाले की, "उद्धव ठाकरे वारंवार निवडणूकीच्या दिवशीच पत्रकार परिषदा घेत आहेत. त्यांच्या पत्रकार परिषदेला परवानगी होती का? यातून त्यांना त्यांचे राजकीय हेतू साध्य करायचे आहेत का? यामध्ये देवेंद्र फडणवीस यांच्यावर केलेले विधान आचारसंहितेचा भंग आहे का? हे निवडणूक आयोगाने तपासावे."

 

 

"निवडणूक यंत्रणांना तक्रार न करता ते थेट पत्रकार परिषद घेत आहेत. उद्धव ठाकरे यांनी केलेले आरोप असत्य आहेत. पहिल्यांदा ठाकरे बंधूंनी मतचोरीचा आरोप केला. पण ही चोरी नसून त्यांच्या बुद्धीतील हेराफेरी आहे. त्यांच्या राजकीय मेंदूमध्ये केमिकल लोचा झाला आहे. त्यामुळे ठाकरे बंधूंच्या पक्षांचे सल्लागार सडके आणि दोन्ही ठाकरे रडके, अशी स्थिती आहे. रडायचेच असेल तर लढता कशाला? मुंबईतील मतदार रडक्यांबरोबर जाणार नाहीत. ठाकरे बंधूंच्या पक्षाचा लोकशाही आणि लोकशाही यंत्रणांवर विश्वास दिसत नाही. त्यामुळे मतदार आणि लोकशाही वाचवण्यासाठी मोठ्या प्रमाणात मतदान करा, ही आमची मतदारांना विनंती आहे," असे ते म्हणाले.