व्याज परतावा कर्ज योजनांसाठी शासकीय महामंडळांनी ; महिला व बालविकास मंत्री आदिती तटकरेंचे निर्देश

मुंबई,  मुंबई जिल्हा मध्यवर्ती सहकारी बँकेने मुख्यमंत्री माझी लाडकी बहीण योजनेच्या आधारे तयार केलेल्या महिलांसाठीच्या व्यावसायिक कर्ज योजनेसाठी महामंडळांनी बँकेबरोबर आठ दिवसांत सामंजस्य करार करावा, असे निर्देश महिला व बालविकास मंत्री आदिती तटकरे यांनी अण्णासाहेब पाटील आर्थिक विकास महामंडळ, इतर मागास विकास मंडळ आणि विमुक्त जाती व भटक्या जमाती विकास महामंडळाच्या अधिकाऱ्यांना दिले आहेत. महिला व बालविकास मंत्र्यांच्या अध्यक्षतेखाली आज मंत्रालयात महामंडळाचे अधिकारी आणि मुंबई बँकेचे पदाधिकारी, अधिकारी यांची संयुक्त बैठक पार पडली. या बैठकीत मंत्री तटकरे यांनी हे आदेश दिले आहेत.

बैठकीला विधान परिषदेचे गटनेते तथा मुंबई बँकेचे अध्यक्ष प्रविण दरेकर, उपाध्यक्ष सिद्धार्थ कांबळे, आमदार चित्रा वाघ, अण्णासाहेब आर्थिक विकास महामंडळाचे अध्यक्ष नरेंद्र पाटील, माविम, महामंडळाचे अधिकारी, मुंबई बँकेचे कार्यकारी संचालक, सर मुख्यव्यवस्थापक, विशेष कार्यकारी अधिकारी, तसेच वित्त, महिला व बालविकास, सामाजिक न्याय व विशेष सहाय्य, नियोजन या विभागाचे अधिकारी उपस्थित होते.

मुंबई बँकेने मुख्यमंत्री माझी लाडकी बहीण योजनेसाठी विशेष अभियान राबवून महिलांची शून्य शिल्लक रकमेची ५३,३५७ इतकी बचत खाती उघडली असून महिला सशक्तीकरणासाठी व्यावसायिक कर्ज योजना सुरू केली आहे. महिलांसाठी सुरू केलेल्या या कर्ज योजनेची सांगड महामंडळाच्या व्याज परतावा योजनेशी घालण्याबाबत बँकेने शासनाला विनंती केली होती. मुख्यमंत्री महोदयांनी स्वतः बैठक घेऊन बँकेच्या विनंतीनुसार कार्यवाही करण्याच्या सूचना दिल्या होत्या. मुख्यमंत्र्यांनी दिलेल्या आदेशाबाबत महिला व बालविकास मंत्र्यांनी आढावा बैठक आयोजित केली होती.

मुख्यमंत्री माझी लाडकी बहीण योजनेच्या आधारे महिलांच्या सशक्तीकरणासाठी मुंबई बँकेने कर्ज योजनेच्या माध्यमातून पुढाकार घेतला आहे. महामंडळांनी तातडीने कार्यवाही करावी, अशी अपेक्षा दरेकर यांनी बैठकीत व्यक्त केली. सहकार आयुक्तांनी टाकलेल्या काही अटी या योजनेसाठी अडचणीच्या आहेत, त्या रद्द कराव्यात, मुख्यमंत्री माझी लाडकी बहीण योजनेच्या शासन निर्णयात काही बदल करावेत, अशीही मागणी दरेकर यांनी बैठकीत केली. या सर्व सूचनांच्या अनुषंगाने विभागाने तातडीने कार्यवाही करण्याचे आदेश मंत्री तटकरे यांनी अधिकाऱ्यांना दिले आहेत.

शासन निर्णयात अपेक्षित दुरुस्ती करावी

मुंबई बँकेच्या महिलांसाठीच्या कर्ज योजनेची सांगड शासकीय महामंडळाच्या व्याज परतावा योजनेशी घालण्याचा निर्णय मुख्यमंत्र्यांनी घेतलाय. शासकीय महामंडळाच्या व्याज परतावा योजनेचा लाभ व लाडकी बहीण योजनेचा लाभ असा दुहेरी लाभ ठरवून अशा महिलांना या योजनेतून अपात्र ठरविले जाण्याची शक्यता आहे. शासनाने ठरविलेले उद्दिष्ट पुढे नेण्यासाठी मुख्यमंत्री माझी लाडकी बहीण योजना पुढे घेऊन जाणारी मुंबई बँक व महामंडळाची व्याज परतावा कर्ज योजना आहे. त्यामुळे असा दुहेरी लाभ ठरविण्यात येऊ नये. तसे लेखी परिपत्रक विभागाने काढावे व शासन निर्णयात अपेक्षित दुरुस्ती करावी, असे आ. प्रविण दरेकरांनी बैठकीत स्पष्ट केले.

मुंबई बँकेला व्याज परतावा योजनेसाठी प्राधिकृत करण्याची कार्यवाही महामंडळानी तातडीने करावी

मुंबई बँकेने विविध महामंडळाच्या व्याज परतावा योजनेशी मुंबई बँकेच्या महिलांसाठीच्या कर्ज योजनेशी सांगड घालण्यासाठी विशेष कर्ज धोरण मंजूर केले आहे. महामंडळांनी बँकेला व्याज परतावा योजनेशी प्राधिकृत करावे, तसे लेखी परिपत्रक काढावे, अशी विनंती

महामंडळांना केली आहे. या संदर्भातील सामंजस्य करार करण्यास मुंबई बँक तयार आहे. रिझर्व्ह बँकेची मुंबई जिल्हा बँकेला मान्यता आहे. त्यामुळे सामंजस्य करार करण्याची व मुंबई बँकेला व्याज परतावा योजनेसाठी प्राधिकृत करण्याची कार्यवाही महामंडळांनी तातडीने करावी, असे बँकेला अपेक्षित असल्याचेही दरेकरांनी म्हटले.