महायुतीमध्ये आणखी एका मित्रपक्षाची भाजपला साथ!

 

नाशिक : महायुतीमध्ये आणखी एका मित्रपक्षाची भाजपला साथ मिळाली आहे. लोकनेते स्व. विनायक मेटे यांचे बंधू रामहरी मेटे यांनी लोकसभा निवडणुकीसाठी जय शिवसंग्राम संघटनेचा भाजपला जाहीर पाठिंबा असल्याचे जाहीर केले. दरम्यान, त्यांनी भाजप प्रदेशाध्यक्ष चंद्रशेखर बावनकुळे यांची नाशिक येथे भेट घेतली.

 

मराठा समाजाला टिकणारे आरक्षण दिल्यामुळे रामहरी मेटे भाजपसोबत आले असल्याचे सांगण्यात येत आहे. जय शिवसंग्रामने यासंबंधी एक पत्रही जारी केले. यात भाजप महायुतीने मराठा समाजाला टिकणारे आरक्षण देण्यासह अनेक समाजहिताचे निर्णय घेतल्याचे म्हटले आहे. तसेच स्व. विनायकराव मेटे हे अखेरपर्यंत युतीधर्म पाळत भाजपासोबत एकनिष्ठ राहिले. जय शिवसंग्राम संघटना स्व. विनायकराव मेटे आणि मराठा भूषण अण्णासाहेब पाटील यांच्या विचाराने प्रेरित होऊन हे कार्य पुढे चालवत आहे, असे म्हणत महायूतीला बिनशर्त पाठिंबा देत असल्याचे जाहीर केले.

 

 

दरम्यान, चंद्रशेखर बावनकुळेंनी शिवसंग्रामचे महायूतीमध्ये स्वागत करत त्यांचे आभार व्यक्त केले. याशिवाय भाजप आणि जय शिवसंग्राम यांच्यातील समन्वयासाठी आमदार श्रीकांत भारतीय व अमित जाधव यांची नियुक्ती करण्यात आल्याचे सांगण्यात येत आहे.