Leopard: रक्त संक्रमणामुळे वाचला मादी बिबट्याचा जीव
महाराष्ट्रातला पहिलाच यशस्वी प्रयोग; रक्त देणारी आणि घेणारी दोन्ही मादी बिबट्या सुखरूप
20-Sep-2022
Total Views | 51
5
मुंबई : पुण्यातील 'रेस्क्यू' या वन्यजीव बचाव संस्थेने जून महिन्यात वेळेत बिबट्यावर (Leopard)उपचार करत एका पाच महिन्याच्या मादी बिबट्याचे प्राण वाचवले. एका निरोगी बिबट्याकडून रक्त संक्रमण करून या अशक्त पिल्लाला देण्यात आले. उपचारानंतर हे पिल्लू स्थिरावले. आणि आता या पिल्लाची प्रकृती पूर्ण ठणठणीत आहे. सध्या हे पिल्लू 'रेस्क्यू'च्या पुण्यातील सेंटर ठेवण्यात आले आहे.
नाशिकहून वाचवण्यात आलेल्या दोन मादी पिल्लांना पुण्याच्या 'रेस्क्यू' या वन्यजीव संस्थेकडे आणण्यात आले होते. जून महिन्यात बचाव होऊन आलेल्या २ मादी पिल्लांची तब्येत अत्यंत खराब होती. एक पिल्लू तर शेवटच्या घटका मोजत होते. या बिबट्याची रक्त तपासणी केली असता या मादी पिल्लाला गंभीर 'मॅलेसेझिया' असल्याचे आढळून आले. या पिल्लाची रोग प्रतिकार शक्ती देखील नाहीशी झाली होती. प्रधान मुख्य वन संरक्षक (वन्यजीव) यांची परवानगी घेऊन या मादी बिबट्याच्या पिल्लाला एका निरोगी बिबट्या पिल्लाकडून रक्त संक्रमण करून देण्यात आले. वन्यजीव पशुवैद्य डॉ. निकिता मेहता आणि डॉ. कल्याणी ठाकूर यांनी रक्ताच्या यशस्वी क्रॉस-मॅचिंगनंतर ही प्रक्रिया यशस्वीपणे पार पाडली.दाता आणि प्राप्तकर्ता दोन्ही सुखरूप आहेत. हा महाराष्ट्रातील वन्य जिवांमधील रक्त संक्रमणाचा पहिलाच प्रयोग असून तो यशस्वी झाल्याबद्दल रेस्क्यू संस्थेच्या संस्थापक डॉ नेहा पंचमिया यांनी आनंद व्यक्त केला.