समरसतेतून ‘अंत्योदय’

दरम्यान, राष्ट्रपतीपदासाठी प्रथम शरद पवार आणि त्यानंतर गोपालकृष्ण गांधी या नेहमीच्या नावांप्रमाणे यंदा फारुख अब्दुल्ला यांचे नाव नव्यानेच विरोधी पक्षांनी चर्चेत आणले आणि अखेर तृणमूल काँग्रेसच्याच यशवंत सिन्हा यांची उमेदवारी निश्चित करण्यात आली आहे. सिन्हा यांची निवड केली जात असतानाच मंगळवारी दिल्लीतील राजकीय वातावरणामध्ये महाराष्ट्रातील राजकीय घडामोडींनी रंग भरण्यास प्रारंभ केला होता. शिवसेना नेते एकनाथ शिंदे आपले समर्थक आमदार घेऊन गुजरातमधील सुरतमध्ये दाखल झाले होते, तर महाराष्ट्र विधानसभेचे विरोधी पक्षनेते आणि माजी मुख्यमंत्री देवेंद्र फडणवीस पक्षातील वरिष्ठ नेत्यांची भेट घेण्यासाठी दिल्लीत दाखल झाले होते.

मुर्मू यांची निवड आता केवळ औपचारिकताच

मुर्मू यांच्या उमेदवारीमुळे यशवंत सिन्हा यांच्यासह विरोधी पक्षांपुढे धर्मसंकट उभे राहिले आहे. एकीकडे यशवंत सिन्हा यांची कारकिर्द ही सनदी अधिकारी ते केंद्रीय मंत्री अशी प्रस्थापित राहिली आहे, तर दुसरीकडे मुर्मू यांनी शिक्षक - नगरसेविका - आमदार - राज्यपाल असा प्रवास केला आहे. अतिशय दुर्गम भागातून सामाजिक-राजकीय कार्यास मुर्मू यांनी प्रारंभ केला आहे. त्यामुळे देशाच्या ग्रामीण भागातील व्यक्ती काय विचार करतो, याची त्यांना नेमकी जाणीव आहे. त्यांच्या उमेदवारीद्वारे भाजपने सामाजिक समरसतेसह अंत्योदयाचा विचार पुन्हा एकदा मांडला आहे. त्यामुळे मुर्मू यांच्याद्वारे देशात सामाजिक समरतेच्या विचारास अधिक गती मिळणार, यात कोणतीही शंका नाही.