दिलासादायक ! भारतात चाचण्यांच्या तुलनेत केवळ ५ टक्के लोकांना कोरोना

इतर देशांच्या तुलनेत भारताने कोरोनाबाबात उपाययोजना राबवायला लवकरच सुरुवात केली. कोरोनाचे भारतात रुग्ण वाढण्याची शक्यता लक्षात घेता पंतप्रधान नरेंद्र मोदी यांनी तीन आठवड्यांचा लॉकडाऊन जाहीर केला. त्यामुळे कोरोना वाढीचा वेग थोपावण्यात भारताला मोठ्या प्रमाणात यश आले. मात्र दिल्लीच्या निझामुद्दिन येथे झालेल्या तबलिगींच्या मरकज कार्यक्रमामुळे देशातील कोरोनाच्या रुग्णांची संख्या वाढली. त्यामुळे तबलिगींमुळे वाढलेला संसर्ग रोखण्यासाठी मरकजमध्ये सहभागी तबलिगींनी शोधून त्यांना क्वारंटाईन करण्यात केंद्र सरकारला मोठ्या प्रमाणात यश आले आहे.

दुसरीकडे, मार्च महिन्याच्या सुरवातीला अमेरिकेतही कोरोनाचे रुग्ण वाढत असताना अमेरिेकेतील सरकारने तेथे प्रांतनिहान लॉकडाऊन जाहीर केला. मात्र, स्थानिक अमेरिकी नागरिकांनी त्याला गांभीर्याने घेतलेच नाही. अनेकांनी आपल्याला काही होत नाही, या अविर्भावात पब, पार्टी, कार्यक्रमांना हजेरी लावली. त्यामुळे अमेरिकेत कोरोनाचा संसर्ग झपाट्याने वाढला. अखेर खडबडून जागे झालेल्या अमेरिकी सरकारने कोरोनाचा संसर्ग रोखण्यासाठी चाचण्यांचा वेग वाढवला. ६ मार्चला अवघ्या १७९४ चाचण्या करणाऱ्या अमेरिकेने महिन्याभरात म्हणजे ६ एप्रिलला तब्बल १९ लाख १७ हजार चाचण्या केल्या. त्यातून अमेरिकेतील रुग्णांची संख्या चार लाखांच्या पुढे गेली. त्यापैकी १३ हजार जणांना आपला जीव गमवावा लागला. म्हणजे एकूण चाचण्यांच्या तुलनेत अमेरिकेतील कोरोना रुग्णांचे प्रमाण २० टक्के आहे.