कुंकवाबाबतच्या चुकीच्या दाव्याने प्रियांक खर्गे तोंडघशी; व्हायरल व्हिडिओनंतर मोठा राजकीय वाद, हिंदू परंपरांवरील अज्ञानाचा नमुना?

 

मुंबई (Priyank Kharge Saffron Remark) : कपाळावर लावल्या जाणाऱ्या तिलकासाठी वापरल्या जाणाऱ्या सुमारे ९० टक्के केशराची आयात इस्लामिक देशांतून होत असल्याचा दावा कर्नाटकचे गृहमंत्री प्रियांक खर्गे यांनी केलाय. त्यांच्या झालेल्या या व्हायरल व्हिडिओनंतर मोठा राजकीय वाद निर्माण झाल्याचे दिसते आहे. सोशल मीडियावरील अनेकांनी या विधानावर तीव्र टीका करत प्रियांक खर्गेंनी कुंकू आणि केशर या दोन पूर्णपणे वेगळ्या गोष्टींची गल्लत केल्याचा आरोप केला आहे.

 

संबंधित व्हिडिओनुसार प्रियांक खर्गे यांनी एका कार्यक्रमात बोलताना दावा केला की, तिलकासाठी वापरले जाणारे बहुतांश केशर जर मुस्लिमबहुल देशांतून आयात होत असेल, तर हिंदुत्वाचा पुरस्कार करणाऱ्यांनी त्याचाही वापर बंद करावा. त्यांच्या या विधानाचा व्हिडिओ सोशल मीडियावर मोठ्या प्रमाणात व्हायरल झाला आणि त्यानंतर टीका तसेच तथ्य पडताळणीची लाट उसळली. भाजपने या विधानावर जोरदार हल्लाबोल करत खर्गे यांनी हिंदू परंपरांबाबतचे अज्ञान दाखवून दिल्याचा आरोप केला. पक्षाच्या नेत्यांनी स्पष्ट केले की, धार्मिक विधींमध्ये कपाळावर लावले जाणारे पारंपरिक कुंकू केशरापासून तयार होत नाही. पारंपरिक पद्धतीने हळदीवर चुना प्रक्रिया करून नैसर्गिक रासायनिक अभिक्रियेमुळे लाल रंगाचे कुंकू तयार केले जाते.(Priyank Kharge Saffron Remark)