प्रांबानन मंदिराच्या जीर्णोद्धारासाठी भारताचा ऐतिहासिक पुढाकार; पंतप्रधान नरेंद्र मोदी आणि इंडोनेशियाचे राष्ट्राध्यक्ष प्रबोवो सुबियांतो यांच्या हस्ते मंदिर संवर्धन प्रकल्पाचे उद्घाटन

 

 

या भेटीदरम्यान पंतप्रधान नरेंद्र मोदी यांनी प्रांबानन मंदिरात जाऊन भगवान शिव, भगवान विष्णू आणि भगवान ब्रह्मा या त्रिमूर्तींचे दर्शन घेत पूजन केले. त्यांनी मंदिर परिसरातील अधिकाऱ्यांशीही संवाद साधला. मंदिरात बोलताना पंतप्रधान मोदी म्हणाले की, त्यांच्या आयुष्यभर त्यांना भगवान शिवांशी एक विशेष आध्यात्मिक नाते असल्याची अनुभूती झाली आहे. ते म्हणाले की, त्यांचा जन्म गुजरातमधील वडनगर येथे झाला, जिथे हाटकेश्वर महादेव मंदिर आहे. गुजरातमध्येच पहिले ज्योतिर्लिंग सोमनाथ असून त्याच्या विकासाची जबाबदारी सांभाळण्याचे भाग्य त्यांना लाभले. तसेच, ते काशी विश्वनाथ महादेवांचे स्थान असलेल्या वाराणसीचे प्रतिनिधित्व करतात आणि केदारनाथ तसेच उज्जैन महाकाल मंदिरांच्या पुनर्विकासात योगदान देण्याची संधीही त्यांना मिळाली. (Prambanan Temple Restoration Project)

 

याप्रसंगी उपस्थितांना संबोधित करताना पंतप्रधान मोदी यांनी प्रांबानन मंदिराचा वैभवशाली वारसा शतकानुशतके जतन केल्याबद्दल इंडोनेशियातील जनतेचे आभार मानले. त्यांनी सांगितले की, भारत आणि इंडोनेशिया यांच्यातील सांस्कृतिक नाते आजही दोन्ही देशांतील जनतेला अधिक जवळ आणत आहे. ते म्हणाले की, इंडोनेशियातील नागरिकांशी संवाद साधताना त्यांना नेहमीच समान संस्कृतीचा सुगंध जाणवतो आणि तोच सांस्कृतिक वारसा भारतातही खोलवर रुजलेला आहे. हा समान वारसा भौगोलिक सीमा ओलांडून दोन्ही देशांतील जनतेला जोडतो. सुमारे १,२०० वर्षांपासून प्रांबानन मंदिर संकुलाचे श्रद्धेने संरक्षण आणि जतन केल्याबद्दल त्यांनी इंडोनेशियातील जनतेचे तसेच पूर्वीच्या शासकांचेही विशेष आभार मानले. (Prambanan Temple Restoration Project)

 

पंतप्रधान मोदी म्हणाले की, मंदिरात महामृत्युंजय मंत्र आणि "ॐ नमः शिवाय" या मंत्रांचा निनाद ऐकून ते अत्यंत भावूक झाले. युनेस्को जागतिक वारसा स्थळावरील संवर्धन आणि जीर्णोद्धाराचे काम सुरू झाल्यानंतर आगामी काळात अधिकाधिक भारतीय पर्यटक प्रांबानन मंदिराला भेट देतील, असा त्यांना विश्वास असल्याचे त्यांनी सांगितले. प्रांबानन मंदिर हे इंडोनेशियातील सर्वात मोठे हिंदू मंदिर संकुल असून ते देशातील सर्वात महत्त्वाच्या ऐतिहासिक आणि सांस्कृतिक वारसा स्थळांपैकी एक आहे. भारत-इंडोनेशियाचा हा संयुक्त संवर्धन प्रकल्प दोन्ही देशांतील दीर्घकालीन सांस्कृतिक आणि सभ्यतागत संबंध आणखी दृढ करण्यास महत्त्वाची भूमिका बजावणार आहे. (Prambanan Temple Restoration Project)