माओवाद्यांचा शस्त्रनिर्मिती कारखाना उद्ध्वस्त

 

मुंबई : (Gadchiroli Anti-Maoist Operation) माओवादाविरोधातील मोठ्या कारवाईत गडचिरोली पोलिस आणि केंद्रीय राखीव पोलीस दल (सीआरपीएफ) यांनी महाराष्ट्र-छत्तीसगड सीमेवरील जंगलात लपवून ठेवलेला माओवाद्यांचा शस्त्रनिर्मिती कारखाना उद्ध्वस्त केला असून, जमिनीत पुरून ठेवलेला मोठ्या प्रमाणातील शस्त्रे आणि स्फोटकांचा साठाही नष्ट केला आहे. अलीकडील काळातील माओवादविरोधातील सर्वांत महत्त्वाच्या मोहिमांपैकी एक मानल्या जाणाऱ्या या कारवाईत गडचिरोली पोलिसांनी सीआरपीएफच्या सहकार्याने बालबेडा जंगल परिसरात गुप्तपणे उभारलेला माओवाद्यांचा शस्त्रनिर्मिती कारखाना आणि जमिनीत लपवून ठेवलेला मोठा शस्त्रसाठा शोधून काढला व नष्ट केला.

 

मिळालेल्या माहितीनुसार, दि. २७ जून रोजी ही कारवाई करण्यात आली. गुप्त माहितीच्या आधारे माओवाद्यांनी जंगलात भूमिगत स्वरूपात शस्त्रे, स्फोटके आणि सुरक्षा दलांवर हल्ले करण्यासाठी वापरल्या जाणाऱ्या साहित्याची निर्मिती व साठवणूक करण्यासाठी सुविधा उभारल्याचे समोर आले होते. अधिकाऱ्यांनी या कारवाईला गडचिरोली जिल्ह्यातील माओवादी कारवाया पूर्णपणे संपविण्याच्या दिशेने टाकलेले आणखी एक निर्णायक पाऊल असे म्हटले आहे.(Gadchiroli Anti-Maoist Operation)

 

पोलीस अधिकाऱ्यांच्या माहितीनुसार, गडचिरोलीतील माओवादी चळवळ आता जवळपास पूर्णपणे निष्प्रभ झाली असून, जिल्ह्यातील तिचा शेवटचा टप्पा सुरू आहे. अनेक दशकांपासून माओवादी महाराष्ट्र–छत्तीसगड सीमेवरील दाट जंगलांचा वापर शस्त्रनिर्मिती, स्फोटक उपकरणे तयार करणे आणि शस्त्रे जमिनीत खोलवर पुरून ठेवण्यासाठी करत होते. त्यानंतर माओवादी सप्ताह, निवडणुका किंवा इतर महत्त्वाच्या काळात हा साठा बाहेर काढून सुरक्षा दलांवर हल्ले किंवा विध्वंसक कारवाया केल्या जात असत. सुरक्षा यंत्रणांच्या मते, अशा गुप्त शस्त्रसाठ्यांचा शोध घेऊन त्यांचा नायनाट करणे हे भविष्यात माओवादी हिंसाचाराला पुन्हा उभारी मिळू न देण्यासाठी अत्यंत महत्त्वाचे आहे.(Gadchiroli Anti-Maoist Operation)

 

२६ जून रोजी गडचिरोली आणि प्राणहिता विशेष अभियान पथकांच्या सहा तुकड्या, बॉम्ब शोध व निकामी पथक आणि सीआरपीएफचे एक पथक अशा संयुक्त दलाला बालबेडा जंगलात रवाना करण्यात आले. माओवाद्यांनी उभारलेला भूमिगत शस्त्रनिर्मिती कारखाना तसेच जंगलात लपवून ठेवलेली शस्त्रे, स्फोटके आणि इतर साहित्य शोधण्यासाठी व्यापक शोधमोहीम हाती घेण्यात आली. २७ जून रोजी जंगल परिसराला पूर्णपणे घेराव घातल्यानंतर बीडीडीएसच्या जवानांनी सखोल तपासणी केली. या वेळी जंगलातील जमिनीखाली पुरून ठेवलेले मोठ्या प्रमाणात शस्त्रनिर्मितीचे साहित्य आणि उपकरणे जप्त करण्यात आली.

जप्तीची कारवाई पूर्ण झाल्यानंतर वरिष्ठ अधिकाऱ्यांच्या आदेशानुसार हे सर्व साहित्य घटनास्थळीच नष्ट करण्यात आले, जेणेकरून त्याचा पुन्हा कोणत्याही प्रकारे वापर होऊ शकणार नाही. गेल्या काही महिन्यांत गडचिरोलीमध्ये सुरक्षा दलांनी माओवाद्यांविरोधात सातत्याने यशस्वी मोहिमा राबवल्या आहेत. भूमिगत शस्त्रनिर्मिती केंद्रे उद्ध्वस्त करणे, लपवून ठेवलेले शस्त्रसाठे नष्ट करणे आणि त्यांच्या रसद व्यवस्थेवर घाव घालणे या कारवायांमुळे या भागातील माओवाद्यांची कार्यक्षमता मोठ्या प्रमाणात खिळखिळी झाली असल्याचे सुरक्षा यंत्रणांनी नमूद केले आहे.(Gadchiroli Anti-Maoist Operation)

 

जप्त करण्यात आलेल्या साहित्यामध्ये पुढील बाबींचा समावेश होता :

 

अंदाजे ५ ते ६ टन वजनाचे एक हेवी-ड्युटी लेथ मशीन

१५० क्लेमोर माईन आणि बॅरल ग्रेनेड लाँचर (बीजीएल) पाईप

२२० बारा बोअर बंदुकांच्या नळ्या (बॅरल्स/पाईप)

२० रायफल रॉड आणि धातूच्या पट्ट्या

शस्त्रनिर्मितीसाठी वापरले जाणारे इतर विविध माओवादी साहित्य

(हे साहित्य माओवादी कॅडरकडून बंदुका, स्फोटक उपकरणे आणि इतर शस्त्रांची निर्मिती व दुरुस्तीसाठी वापरले जाणार होते.)