बलिदानाची दखल घेऊन मिसिंग लिंक महामार्गाला शिंग्रोबा धनगर यांचे नाव द्या-भाजप राज्यसभा खासदार रामराव वडकुते

 

मुंबई : (Shingroba Dhangar) पुणे ते मुंबईदरम्यान सुरू असलेल्या मिसिंग लिंक महामार्गाला वीर हुतात्मा शिंग्रोबा धनगर यांचे नाव देण्यात यावे, अशी मागणी भाजप राज्यसभा खासदार रामरावजी वडकुते यांनी मुख्यमंत्री देवेंद्र फडणवीस यांच्याकडे निवेदनाद्वारे केली आहे. यावेळी इतर मागास बहुजन कल्याण मंत्री अतूल सावे ,आमदार गोपीचंद पडळकर ,आमदार तानाजीराव मुटकुळे ,आमदार राहुल कुल ,भाजपा प्रदेश कार्यकारणी सदस्य डॉ पंकज भिवटे, संजय कावडे ,गोपाल सातपुते यांची उपस्थिती होती. या मागणीमुळे राज्यात पुन्हा एकदा ऐतिहासिक वारसा आणि हुतात्म्यांच्या स्मृती जतन करण्याचा मुद्दा चर्चेत आला आहे.

 

निवेदनात नमूद केल्यानुसार," ब्रिटिश राजवटीच्या काळात शिंग्रोबा धनगर यांनी देशहितासाठी मोठे योगदान दिले. सातारा जिल्ह्यात जन्मलेले शिंग्रोबा धनगर हे बोरघाट परिसरात मेंढपाळ म्हणून वास्तव्यास होते. त्या काळात मुंबई ते ठाणे रेल्वेमार्गाचा विस्तार पुण्यापर्यंत करण्यासाठी इंग्रजांनी प्रयत्न सुरू केले होते. मात्र, सह्याद्रीच्या डोंगररांगांमधून योग्य मार्ग शोधणे त्यांच्यासाठी मोठे आव्हान ठरत होते. अशा परिस्थितीत शिंग्रोबा धनगर यांनी आपल्या स्थानिक ज्ञानाच्या जोरावर घाटातून मार्ग कसा काढता येईल हे इंग्रजांना दाखवून दिले. त्यांच्या या योगदानामुळेच पुढील वाहतूक आणि दळणवळण सुलभ होण्यास मदत झाली."असा दावा निवेदनात करण्यात आला आहे.(Shingroba Dhangar)

 

हेही वाचा :  मेट्रो, रेल्वे, बस स्थानक, सार्वजनिक ठिकाणी स्व-गणना संदर्भात जनजागृती करण्यास भर द्या- अश्विनी भिडे यांचे निर्देश

 

राज्यातील महत्त्वाच्या पायाभूत प्रकल्पापैकी एक असलेल्या पुणे ते मुंबई मिसिंग लिंक महामार्गाला शिंग्रोबा धनगर यांचे नाव देणे ही त्यांच्या बलिदानाची खरीखुरी आदरांजली ठरेल, असे मत त्यांनी व्यक्त केले.(Shingroba Dhangar)