विधानपरिषदेच्या १६ जागांसाठी निवडणूक कार्यक्रम जाहीर;१८ जून रोजी मतदान; २२ जूनला निकाल

 

मुंबई : (Maharashtra Legislative Council) प्रदीर्घ काळापासून रिक्त असलेल्या राज्यातील विधान परिषदेच्या स्थानिक स्वराज्य संस्था मतदारसंघाच्या १६ जागांसाठी अखेर निवडणूक कार्यक्रम जाहीर झाला आहे. येत्या १८ जून २०२६ रोजी या जागांसाठी मतदान होणार असून २२ जून रोजी निकाल लागणार आहे. यामुळे पावसाळी अधिवेशनाच्या आधी विधानपरिषदेच्या सदस्यसंख्येत भर पडणार आहे.

 

राज्यातील स्थानिक स्वराज्य संस्थांच्या निवडणूका न झाल्याने जवळपास गेल्या ४ वर्षांपासून या मतदारसंघांतील जागा रिक्त आहे. स्थानिक स्वराज्य संस्थांच्या मतदारसंघात निवडणूक घेण्यासाठी किमान ७५ टक्के स्थानिक संस्था कार्यरत असणे आणि ७५ टक्के मतदार पदावर असणे अनिवार्य असते. मात्र, या निकषांची पूर्तता न झाल्यामुळे २०२२, २०२४ आणि २०२५ मध्ये रिक्त झालेल्या एकूण १६ जागांवर जागांवर निवडणूक घेता आली नव्हती. आता या निकषांची पूर्तता झाल्यानंतर केंद्रीय निवडणूक आयोगाने निवडणूक कार्यक्रम जाहीर केला आहे.

 

 

यासोबतच मंत्री चंद्रशेखर बावनकुळे आमदार राहिलेल्या विधान परिषदेच्या नागपूर स्थानिक स्वराज्य संस्था मतदारसंघासाठीची पोटनिवडणूकही जाहीर करण्यात आली आहे. त्यामुळे एकूण १७ जागांवर ही निवडणूक होणार आहे.(Maharashtra Legislative Council)

 

 

 

अधिकृत अधिसूचना जारी करणे : २५ मे २०२६ (सोमवार)

उमेदवारी अर्ज भरण्याची अंतिम मुदत : ०१ जून २०२६ (सोमवार)

उमेदवारी अर्जांची छाननी : ०२ जून २०२६ (मंगळवार)

उमेदवारी अर्ज मागे घेण्याचा अंतिम दिवस : ०४ जून २०२६ (गुरुवार)

मतदानाची तारीख : १८ जून २०२६ (गुरुवार) (सकाळी ८ ते दुपारी ४ पर्यंत)

मतमोजणी आणि निकाल : २२ जून २०२६ (सोमवार)

 

 

सोलापूर, अहमदनगर, ठाणे, जळगाव, सांगली-सातारा, नांदेड, यवतमाळ, पुणे, भंडारा-गोंदिया, रायगड-रत्नागिरी-सिंधुदुर्ग, नाशिक, वर्धा-चंद्रपूर-गडचिरोली, अमरावती, धाराशिव-लातूर-बीड, परभणी-हिंगोली, संभाजीनगर-जालना, नागपूर (पोटनिवडणूक) या मतदारसंघांमध्ये विधानपरिषदेची निवडणूक पार पडणार आहे.

 

 

प्रशांत परिचारक, अरुणकाका जगताप, रवींद्र फाटक, चंदूभाई पटेल, मोहनराव कदम, अमरनाथ राजूरकर, दुष्यंत चतुर्वेदी, अनिल भोसले, डॉ. परिणय फुके, अनिकेत तटकरे, नरेंद्र दराडे, रामदास अंबटकर, प्रवीण पोटे, सुरेश धस, विप्लव बजोरिया, अंबादास दानवे या सदस्यांचा कार्यकाळ संपलेला आहे.(Maharashtra Legislative Council)