US-Israel-Iran War :"अशा निराधार धमक्यांचा...", डोनाल्ड ट्रम्प यांच्या धमकीनंतर इराणचा मोठा इशारा!

अमेरिका-इस्रायल आणि इराण युद्धाच्या पार्श्वभूमीवर बोलताना आणि डोनाल्ड ट्रम्प यांनी इराणला दिलेल्या धमकीला प्रत्युत्तर देताना इराणचे अध्यक्ष मसूद पेझेश्कियान यांनी म्हटलं की, "इराणला नकाशावरून पुसून टाकण्याचा भ्रम हा इतिहास घडवलेल्या राष्ट्राच्या विरुद्ध एका राष्ट्राची हताशा दर्शवते. अशा धमक्या आमची एकता अधिक दृढ करतात. होर्मुझची सामुद्रधुनी आमच्या भूभागाचं उल्लंघन करणाऱ्यांना वगळून सर्वांसाठी खुली आहे. आम्ही रणांगणावर या निराधार धमक्यांना खंबीरपणे तोंड देतो", अशा शब्दांत इराणचे अध्यक्ष मसूद पेझेश्कियान यांनी डोनाल्ड ट्रम्प यांच्या धमकीला प्रत्युत्तर दिले. (US-Israel-Iran War)

 

डोनाल्ड ट्रम्प यांनी इराणला थेट इशारा देत ४८ तासांत होर्मुझची सामुद्रधुनी खुली करण्याची धमकी दिली होती. पण या धमकीमुळे इराणने संताप व्यक्त केला आणि त्यानंतर इराणने ही सामुद्रधुनी अमेरिका आणि इस्रायल वगळता बाकी सगळ्यांसाठी खुली करण्याचा निर्णय घेतला. मात्र, हा निर्णय घेतल्यानंतर काही तासांतच पुन्हा होर्मुझची सामुद्रधुनी पूर्णपणे बंद करण्याचा इशारा दिला. "जर इराणचे वीज प्रकल्प उद्धवस्त करण्याच्या अमेरिकेने दिलेल्या धमक्यांची अंमलबजावणी झाली तर होर्मुझची सामुद्रधुनी पूर्णपणे बंद केली जाईल आणि जोपर्यंत आमचे नष्ट झालेले वीज प्रकल्प पुन्हा बांधले जात नाहीत तोपर्यंत होर्मुझची सामुद्रधुनी सुरू केली जाणार नाही", असा इशारा इराणच्या खतम अल-अंबिया या लष्करी कमांड युनिटने सरकारी टीव्हीवर प्रसारित केलेल्या एका निवेदनातून दिला आहे. (US-Israel-Iran War)