US-Iran-Israel War : अखेर अमेरिका-इराण युद्धाला 'ब्रेक'! डोनाल्ड ट्रम्प यांची घोषणा; काय म्हणाले?

मुंबई : (US-Iran-Israel War) अमेरिका, इस्त्रायल आणि इराण यांच्यात सुरू असलेल्या युद्धाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी मोठी घोषणा केली आहे. मध्य पूर्वेतील तणाव कमी करण्यासंदर्भात डोनाल्ड ट्रम्प इराणबरोबर सातत्याने चर्चा करत होते. या चर्चा सकारात्मक आणि फलदायी ठरल्या असून इराणवरील नियोजित लष्करी हल्ल्यांना तात्पुरती स्थगिती देण्याची घोषणा केली आहे. तसेच पुढील निर्णय चर्चेनंतर घेतला जाईल, असे ट्रम्प यांनी जाहीर केले आहे.(US-Iran-Israel War)

 

ट्रुथ सोशलवरील पोस्टच्या माध्यमातून डोनाल्ड ट्रम्प यांनी यासंदर्भात माहिती दिली. याबाबत ट्रम्प म्हणाले, "गेल्या दोन दिवसांत अमेरिका आणि इराण यांच्यात मध्यपूर्वेतील संघर्षाच्या संपूर्ण आणि कायमस्वरूपी निराकरणाबाबत अतिशय सकारात्मक आणि फलदायी चर्चा झाली असून, पुढील एक आठवडा ही चर्चा सुरू राहणार आहे. मी अमेरिकेच्या संरक्षण विभागाला इराणच्या वीज प्रकल्प आणि ऊर्जा पायाभूत सुविधांवर होणारे सर्व लष्करी हल्ले पाच दिवसांसाठी स्थगित करण्याचे निर्देश दिले आहेत", अशी माहिती ट्रम्प यांनी दिली. तसेच, मध्यपूर्वेतील तणाव पूर्णपणे संपवण्यासाठी दोन्ही देशांमध्ये गंभीर चर्चा सुरू असल्याचा दावा त्यांनी केला.(US-Iran-Israel War)