Vande Bharat Express stone attack: वंदे भारत एक्सप्रेसवर दारूच्या नशेत तरुणाकडून दगडफेक; पोलिसांनी ठोकल्या बेड्या

 

कल्याण: (Vande Bharat Express stone attack) छत्रपती शिवाजी महाराज टर्मिनस (सीएसएमटी) ते साईनगर शिर्डी वंदे भारत एक्सप्रेसवर शुक्रवारी (१३ मार्च) कल्याण-ठाकुर्ली रेल्वे स्थानकाजवळ दगड फेकल्याची घटना घडली. या घटनेत C-१, C-३, C-४ आणि C-७ डब्यांच्या खिडक्यांचे नुकसान झाले. अचानक झालेल्या दगडफेकामुळे प्रवाशांमध्ये घबराट निर्माण झाली, मात्र कोणी गंभीर जखमी झाले नाही.

 

रेल्वे सुरक्षा बळाच्या (RPF) जवानांनी आणि कल्याण सीआयबीच्या टीमने तत्काळ कारवाई करत सनी कांबळे (२३), पुण्यातील शुक्रवार पेठ भागातील भंगार विक्रेता, याला ताब्यात घेतले. तपासात आरोपीने कबुली दिली की, तो नशेत असल्यामुळे वंदे भारत एक्सप्रेसवर दगड फेकत होता आणि प्रवाशांना घाबरवण्याचा उद्देश होता. घटनेच्या वेळेस तो स्वतःची सेल्फीही घेत असल्याचे प्रवाशांनी सांगितले.

 

जागरूक प्रवाशांनी रेल्वे नियंत्रण कक्षाला तातडीने माहिती दिल्यानंतर RPF आणि सीआयबीच्या जवानांनी पत्रीपूल ते ठाकुर्ली दरम्यान शोध मोहीम राबवून आरोपीला अटक केली. त्याच्यावर रेल्वे सुरक्षा कायद्याच्या कलम १५३ आणि १४७ नुसार गुन्हा नोंदवण्यात आला. न्यायालयाने त्याला न्यायालयीन कोठडीत पाठविण्याचे आदेश दिले आणि सध्या तो आधारवाडी तुरुंगात आहे.

 

घटनेचा व्हिडिओ सोशल मीडियावर व्हायरल झाला असून, लोकांनी या हिंसक कृत्यावर तीव्र प्रतिक्रिया दिली. अनेकांनी सार्वजनिक वाहतूक सुरक्षिततेस धोका पोहोचवणाऱ्यांवर कडक शिक्षा होण्याची मागणी केली आहे.

 

गेल्या काही काळात रेल्वे मार्गांवर दगडफेक आणि चोरीसारख्या घटना वाढल्या आहेत. दोन दिवसापूर्वीच ठाकुर्ली रेल्वे स्थानकाजवळ सिंहगड एक्सप्रेसमध्ये एका प्रवाशाच्या महागड्या मोबाईलवर हल्ला झाला होता. पोलीस तपासत आहेत की, त्या घटनेशी आरोपीचा संबंध आहे की नाही.