कागलमध्ये सहापदरी एलिव्हेटेड कॉरिडॉरला मंजुरी; ३५७.९९ कोटींच्या प्रकल्पामुळे वाहतूक कोंडीला दिलासा

नवी दिल्ली : (6-Lane Elevated Corridor) महाराष्ट्रातील कोल्हापूर जिल्ह्यातील कागल शहरात राष्ट्रीय महामार्ग-४८ वर वाहतुकीचा वाढता ताण लक्षात घेऊन महत्त्वपूर्ण पायाभूत सुविधा प्रकल्पाला मंजुरी देण्यात आली आहे. केंद्रीय मंत्री नितीन गडकरी यांनी कागल परिसरात ६-लेन एलिव्हेटेड कॉरिडॉर बांधण्यास ३५७.९९ कोटी रुपयांची तरतूद करण्यात आली असल्याची माहिती दिली आहे. या प्रकल्पामुळे स्थानिक आणि लांब पल्ल्याच्या वाहतुकीचे विभाजन होऊन वाहतूक व्यवस्थापन अधिक कार्यक्षम होण्याची अपेक्षा व्यक्त करण्यात येत आहे.

 

राष्ट्रीय महामार्ग-४८ हा देशातील सर्वात महत्त्वाच्या महामार्गांपैकी एक असून तो भारताच्या ‘गोल्डन क्वाड्रिलॅटरल’ (GQ) महामार्ग नेटवर्कचा भाग आहे. हा महामार्ग दिल्ली, मुंबई, पुणे, बेंगळुरू आणि चेन्नई या प्रमुख महानगरांना जोडतो. त्यामुळे या मार्गावर मोठ्या प्रमाणात प्रवासी तसेच मालवाहतूक वाहने सतत धावत असतात. कोल्हापूर जिल्ह्यातील कागल परिसरातूनही या महामार्गावर मोठ्या प्रमाणात वाहतूक होते.

 

कागल येथे विकसित करण्यात आलेले ५-स्टार एमआयडीसी औद्योगिक क्षेत्र हे पश्चिम महाराष्ट्रातील एक महत्त्वाचे औद्योगिक केंद्र बनले आहे. या औद्योगिक वसाहतीत अनेक राष्ट्रीय व आंतरराष्ट्रीय कंपन्या कार्यरत असून उत्पादन व निर्यात मोठ्या प्रमाणावर केली जाते. त्यामुळे या भागातून दररोज मोठ्या प्रमाणात मालवाहतूक होते. वाढत्या औद्योगिक क्रियाकलापांमुळे आणि वाहनांच्या वाढत्या संख्येमुळे कागल परिसरात महामार्गावर वारंवार वाहतूक कोंडी निर्माण होते. परिणामी, स्थानिक नागरिकांना तसेच उद्योगांशी संबंधित वाहतुकीला अडथळे निर्माण होत आहेत. वाढत्या वाहतुकीमुळे प्रदूषणातही वाढ होत असून आपत्कालीन सेवांच्या हालचालींवरही परिणाम होत असल्याचे दिसून येते.

 

 

या पार्श्वभूमीवर प्रस्तावित करण्यात आलेला ६-लेन एलिव्हेटेड कॉरिडॉर हा या समस्यांवर प्रभावी उपाय ठरणार असल्याचे मानले जात आहे. एलिव्हेटेड कॉरिडॉरमुळे लांब पल्ल्याची वेगवान वाहतूक उंच मार्गावरून चालेल, तर स्थानिक वाहतूक खालील सर्व्हिस रस्त्यांवरून सुरळीतपणे सुरू राहील. त्यामुळे वाहतुकीतील गोंधळ कमी होऊन वाहनांची गती वाढेल. यामुळे प्रवाशांना सुरक्षित आणि जलद प्रवासाची सुविधा मिळेल, तसेच मालवाहतूक अधिक कार्यक्षम होईल.

 

या प्रकल्पामुळे प्रवासाचा वेळ कमी होण्याबरोबरच इंधन बचत होण्यासही मदत होईल. वाहतूक कोंडी कमी झाल्यामुळे परिसरातील वायुप्रदूषणातही घट होण्याची अपेक्षा आहे. याशिवाय रुग्णवाहिका, अग्निशमन दल आणि इतर आपत्कालीन सेवांना जलद हालचाल करणे शक्य होईल. एकूणच, कागल येथे उभारण्यात येणारा हा एलिव्हेटेड कॉरिडॉर प्रकल्प केवळ वाहतूक व्यवस्थेतील सुधारणा घडवून आणणार नाही, तर या भागातील औद्योगिक वाढ, उत्पादकता आणि आर्थिक विकासालाही चालना देईल. परिणामी, देशांतर्गत मालवाहतूक साखळी अधिक सक्षम होऊन व्यापार आणि उद्योगांना दीर्घकालीन लाभ मिळण्याची शक्यता व्यक्त केली जात आहे.