Mumbai bomb threat : धमकीचा मेल; मुंबईत सुरक्षा यंत्रणा सतर्क! विधानभवन, मेट्रो आणि शेअर बाजारासह ४ ठिकाणांवर मिसाईल हल्ल्याची धमकी

मुंबई : (Mumbai bomb threat) राज्याच्या राजकीय घडामोडींचे केंद्र असलेल्या दक्षिण मुंबईतील विधानभवन परिसरात आज सकाळी एका निनावी ईमेलमुळे प्रचंड खळबळ उडाली. धमकीच्या संदेशात “विधिमंडळाची इमारत बॉम्बने उडवून देऊ” असे म्हटले होते. या गंभीर इशाऱ्यामुळे पोलीस प्रशासन आणि सुरक्षा यंत्रणा तत्काळ सक्रिय झाल्या आणि संपूर्ण परिसरात तातडीने नाकेबंदी आणि सुरक्षा तपासणी सुरू झाली.

 

धमकीचा ईमेल मिळताच मुंबई पोलिसांनी तातडीने बॉम्ब शोधक व नाशक पथक (BDDS) आणि डॉग स्कॉड तैनात केले. विधानभवन आणि सचिवालयाच्या संपूर्ण इमारतीत सखोल सर्च ऑपरेशन राबवण्यात आले. इमारतीचा कानाकोपरा, वाहनतळ आणि परिसरातील संवेदनशील ठिकाणे कसून तपासली गेली. सुरुवातीला कर्मचारी इमारतीबाहेर थांबवले गेले, त्यामुळे काही काळ तणावाचे वातावरण निर्माण झाले होते.

 

तपासणीनंतर प्रत्येक कर्मचाऱ्याची ओळखपत्रे तपासून आणि शारीरिक तपासणी करून, त्यांनाच टप्प्याटप्प्याने प्रवेश दिला गेला. वरिष्ठ पोलीस अधिकाऱ्यांनी विधिमंडळाच्या कामकाजावर परिणाम न होईल याची दक्षता घेतली, तर सुरक्षेशी कोणतीही तडजोड होऊ नये यावरही भर दिला.

 

विधानपरिषदेचे सभापती राम शिंदे यांनी सांगितले की, हा ईमेल सकाळी ६:५७ वाजता प्राप्त झाला. अर्थसंकल्पीय अधिवेशनाच्या पार्श्वभूमीवर हा धमकीचा संदेश पाठवण्यात आला होता. त्यांनी म्हटले की, अजून चार ठिकाणी धमकी दिली असून पोलीस प्रशासनाने तातडीने दखल घेतली आहे.

 

धमकीच्या ईमेलमध्ये विधानभवन, मुंबई उच्च न्यायालय, बॉम्बे स्टॉक एक्सचेंज (BSE), आणि मुंबई मेट्रो स्टेशन यांना लक्ष्य केल्याचे सांगितले होते. यामुळे संपूर्ण मुंबईतील सर्व संवेदनशील ठिकाणांवर हाय अलर्ट जाहीर केला गेला आणि सर्वत्र सशस्त्र पोलीस बंदोबस्त तैनात करण्यात आला.

 

प्राथमिक तपासात या धमकीचा संबंध खलिस्तानी आंदोलनाशी असल्याचे संकेत मिळाले आहेत. ईमेलमध्ये मिसाईल हल्ल्याचा उल्लेख केला होता, त्यामुळे हवाई सुरक्षा आणि अतिरिक्त खबरदारी घेण्यात येत आहे. सभापती राम शिंदे यांनी म्हटले की, “सुरक्षा अधिकारी प्रत्येक बाबीची बारकाईने तपासणी करत आहेत; प्राथमिक तपासणी पूर्ण होईपर्यंत अधिक माहिती उघड करणे धोकादायक ठरेल. मात्र संपूर्ण चौकशी नंतर सर्व तथ्ये समोर येतील.”

 

सध्या सर्व ठिकाणे सुरक्षित आहेत आणि कर्मचारी, मंत्री, आमदार आणि नागरिक सुरक्षित आहेत. प्रशासन सतर्क असून सर्व उपाययोजना कठोर पद्धतीने सुरू आहेत. नागरिकांनी घाबरण्याची गरज नाही, परंतु अधिक काळजीपूर्वक सुरक्षा नियमांचे पालन करावे, असे प्रशासनाचे आवाहन आहे.