Highest Paying Jobs in India: भारतामध्ये सर्वात जास्त पगाराच्या नोकऱ्या कोणत्या? किती पगार मिळतो, जाणून घ्या

 

 

मुंबई : (Highest Paying Jobs in India) भारतामधील काही नोकऱ्या आता इतका जास्त पगार देत आहेत की त्याचे आकडे ऐकून अनेकांना आश्चर्य वाटू शकते. हायरिंग कंपनी मायकेल पेज इंडिया सॅलरी गाइड २०२६ च्या अहवालानुसार, मोठ्या कंपन्यांमध्ये काम करणाऱ्या चीफ फायनान्शियल ऑफिसर (CFO) या पदावरील अधिकाऱ्यांचा वार्षिक पगार ८ कोटी रुपयांपर्यंत पोहोचू शकतो. त्याचप्रमाणे प्रायव्हेट इक्विटी फंडमधील वरिष्ठ अधिकारीही वर्षाला ६ कोटी रुपयांपर्यंत कमाई करत असल्याचे या अहवालात नमूद करण्यात आले आहे.

 

या अहवालानुसार, एकूण पगारवाढीचा वेग काहीसा कमी झाला असला तरी विशिष्ट कौशल्य असलेल्या व्यावसायिकांसाठी कंपन्या अजूनही मोठ्या पगाराच्या ऑफर देण्यास तयार आहेत. विशेषतः आर्टिफिशियल इंटेलिजन्स (AI), सेमीकंडक्टर, इलेक्ट्रिक वाहन आणि ग्रीन एनर्जी या क्षेत्रांमध्ये काम करणाऱ्या तज्ज्ञांना नोकरी बदलल्यास ३० टक्क्यांपर्यंत अधिक पगार मिळू शकतो.

 

कॉर्पोरेट क्षेत्रात सर्वाधिक पगार मिळवणाऱ्या पदांमध्ये CFO हे पद आघाडीवर आहे. ज्या कंपन्यांची वार्षिक उलाढाल १०,००० कोटी रुपयांपेक्षा जास्त आहे, त्या कंपन्यांमध्ये CFO चा पगार साधारणपणे १.७५ कोटी ते ८ कोटी रुपयांदरम्यान असू शकतो.

५,००० ते १०,००० कोटी रुपयांची उलाढाल असलेल्या मध्यम आकाराच्या कंपन्यांमध्ये CFO ला १.५ कोटी ते ४ कोटी रुपये पगार मिळू शकतो. तर १,००० ते ५,००० कोटी उलाढाल असलेल्या कंपन्यांमध्येही CFO चा पगार १ कोटी ते ३ कोटी रुपयांपर्यंत पोहोचू शकतो.

भारतामध्ये प्रायव्हेट इक्विटी आणि इन्व्हेस्टमेंट बँकिंग ही अजूनही सर्वाधिक कमाई करणारी क्षेत्रे मानली जातात. जागतिक प्रायव्हेट इक्विटी फंडमध्ये असोसिएट पदावरील अधिकाऱ्यांना ६० लाख ते १.२ कोटी रुपयांपर्यंत पगार मिळू शकतो.

तर वाइस प्रेसिडेंट पदावरील अधिकाऱ्यांचा पगार १.३ कोटी ते २ कोटी रुपयांदरम्यान असतो. वरिष्ठ स्तरावर डायरेक्टरला १.८५ कोटी ते ४ कोटी रुपये पगार आणि मॅनेजिंग डायरेक्टरला ४ कोटी ते ६ कोटी रुपयांपर्यंत पगार मिळू शकतो.

 

इन्व्हेस्टमेंट बँकिंग क्षेत्रातही मोठ्या प्रमाणावर कमाईची संधी आहे. मल्टिनॅशनल बँकांमध्ये कॉर्पोरेट फायनान्स आणि मर्जर अँड अक्विझिशन (M&A) संबंधित असोसिएट वाइस प्रेसिडेंटला ५५ लाख ते ९० लाख रुपयांपर्यंत पगार मिळतो. तर डायरेक्टरला १ कोटी ते १.५ कोटी आणि मॅनेजिंग डायरेक्टरला २.५ कोटी ते ४ कोटी रुपये पगार मिळू शकतो.

 

भारतामधील मॅन्युफॅक्चरिंग आणि इंजिनिअरिंग क्षेत्र वेगाने बदलत असून या क्षेत्रातही पगार वाढत आहेत. मोठ्या कंपन्यांमध्ये चीफ ऑपरेटिंग ऑफिसर (COO) पदावरील अधिकारी वर्षाला १ कोटी ते ३ कोटी रुपये पगार मिळवू शकतात.

 

मॅन्युफॅक्चरिंग किंवा ऑपरेशन्स हेडचा पगार ८० लाख ते २ कोटी रुपयांपर्यंत असू शकतो. तसेच १५ वर्षांपेक्षा अधिक अनुभव असलेले प्लांट किंवा साइट हेड ७० लाख ते १.५ कोटी रुपयांपर्यंत पगार मिळवू शकतात. विशेषतः सेमीकंडक्टर, इलेक्ट्रिक वाहन आणि ग्रीन एनर्जी क्षेत्रात अभियंत्यांची मागणी वेगाने वाढत आहे.

 

रिअल इस्टेट आणि इन्फ्रास्ट्रक्चर क्षेत्रातही संधी 

रिअल इस्टेट आणि इन्फ्रास्ट्रक्चर क्षेत्रातही वरिष्ठ अधिकाऱ्यांना मोठ्या प्रमाणावर पगार मिळत आहे. मोठ्या प्रकल्पांचे व्यवस्थापन करणारे वरिष्ठ अधिकारी वर्षाला १.५ कोटी ते ६ कोटी रुपयांपर्यंत पगार मिळवू शकतात.

 

याशिवाय १५ ते २५ वर्षांचा अनुभव असलेले प्रोजेक्ट मॅनेजमेंट आणि इंजिनिअरिंग तज्ज्ञ ५० लाख ते १.५ कोटी रुपयांपर्यंत पगार मिळवू शकतात.

 

हेल्थकेअर आणि फार्मा क्षेत्रातही तंत्रज्ञानाचा प्रभाव वाढत आहे. आर्टिफिशियल इंटेलिजन्सच्या मदतीने औषध संशोधन, डायग्नोस्टिक्स आणि रिसर्चच्या पद्धतीत मोठे बदल होत आहेत.

 

फार्मा कंपन्यांमध्ये २५ वर्षांहून अधिक अनुभव असलेल्या वरिष्ठ व्यावसायिकांना ६५ लाख ते १.२ कोटी रुपयांपर्यंत पगार मिळू शकतो. तर मेडिकल डिव्हाइस कंपन्यांमध्ये उच्च पदावरील अधिकाऱ्यांना ३.५ कोटी रुपयांपर्यंत पगार मिळण्याची शक्यता आहे.

 

एकेकाळी HR ला केवळ सपोर्ट फंक्शन म्हणून पाहिले जात होते. मात्र आता परिस्थिती बदलली आहे. मोठ्या कंपन्यांमध्ये HR प्रमुखांचा पगार १.५ कोटी ते ४ कोटी रुपयांपर्यंत पोहोचला आहे.

 

तसेच १५ वर्षांहून अधिक अनुभव असलेल्या कॉम्पेन्सेशन आणि बेनिफिट्स प्रमुखांना १ कोटी ते १.८ कोटी रुपयांपर्यंत पगार मिळू शकतो.

 

या अहवालातील सर्वात महत्त्वाचा निष्कर्ष म्हणजे आता फक्त अनुभवावर नाही तर विशेष कौशल्यांवर पगार अवलंबून असणार आहे.

 

AI, मशीन लर्निंग, सेमीकंडक्टर, इलेक्ट्रिक वाहन, बॅटरी तंत्रज्ञान आणि नवीकरणीय ऊर्जा या क्षेत्रांमध्ये तज्ज्ञता असलेल्या व्यावसायिकांची मागणी झपाट्याने वाढत आहे. अशा कौशल्य असलेल्या व्यक्तींना नोकरी बदलल्यास ३० ते ४० टक्क्यांपर्यंत अधिक पगार मिळू शकतो.

 

एकूणच, भारतातील उच्च पगाराच्या नोकऱ्यांमध्ये CFO, प्रायव्हेट इक्विटी, इन्व्हेस्टमेंट बँकिंग, मॅन्युफॅक्चरिंग, रिअल इस्टेट, हेल्थकेअर आणि HR या क्षेत्रांमध्ये वर्षाला ८ कोटी रुपयांपर्यंत पगार मिळवण्याची संधी उपलब्ध होत असल्याचे या अहवालातून स्पष्ट झाले आहे.