Sonu Sood: ऑनलाइन गेमच्या व्यसनाने गाझियाबादमध्ये तीन बहिणींचा मृत्यू, सोनू सूदची भावनिक प्रतिक्रिया, नेमकं काय म्हणाला?

 

 

 

सोनू सूद म्हणाले, “आज गाझियाबादमध्ये तीन मुलींनी जीव गमावला. हे मृत्यू गरिबीमुळे किंवा हिंसेमुळे नाहीत, तर ऑनलाइन गेमिंग आणि डिजिटल व्यसनाच्या अदृश्य दबावामुळे झालेत. मी आधीही सांगितलंय आणि पुन्हा सांगेन, १६ वर्षांखालील मुलांसाठी शिक्षणाव्यतिरिक्त सोशल मीडिया आणि ऑनलाइन गेमिंगवर कडक निर्बंध असायला हवेत.”

 

 

गाझियाबादमधील शालीमार गार्डन परिसरात ४ फेब्रुवारीच्या पहाटे एक धक्कादायक घटना घडली. भारत सिटी या निवासी संकुलातील एका उंच इमारतीवरून पडल्यामुळे तीन अल्पवयीन मुलींचा मृत्यू झाला. पोलिसांना रात्री सुमारे २.१५ वाजता माहिती मिळाल्यानंतर ते तात्काळ घटनास्थळी पोहोचले. मुलींना १०८ रुग्णवाहिकेतून रुग्णालयात नेण्यात आले; मात्र डॉक्टरांनी त्यांना मृत घोषित केले.

 

मृत मुली अनुक्रमे १६, १४ आणि १२ वर्षांच्या होत्या. प्राथमिक तपासात त्या ऑनलाइन गेम्स आणि कोरियन मनोरंजन संस्कृतीकडे आकर्षित झाल्या होत्या, अशी माहिती समोर आली आहे. काही दिवसांपूर्वी त्यांच्या मोबाईल वापरावर निर्बंध आणण्यात आल्याचेही समजत आहे.

पोस्टमॉर्टम अहवालानुसार उंचावरून पडल्यामुळे झालेल्या गंभीर जखमा आणि रक्तस्त्राव ही मृत्यूची कारणं आहेत. नेमकं कारण काय, याबाबत पोलीस अजूनही सर्व बाजूंनी तपास करत आहेत.

 

प्राथमिक तपासात मुलींना ऑनलाइन गेम्स, कोरियन संगीत, ड्रामा आणि परदेशी संस्कृतीची मोठी आवड होती, अशी माहिती पोलिसांनी दिली. त्यांनी आपली नावेही बदलल्याचं समोर आलं. मात्र अधिकाऱ्यांनी स्पष्ट केलं की कोणताही टास्क-आधारित गेम किंवा एखादं अॅप हे एकमेव कारण ठरवणं योग्य ठरणार नाही.

 

उपायुक्त निमिष पाटील यांच्या मते, सुसाइड नोटमध्ये काही आरोप नमूद होते; परंतु पोस्टमॉर्टम अहवालात मारहाणीच्या खुणा आढळलेल्या नाहीत.

पोलिसांनी दिलेल्या माहितीनुसार, कुटुंब आर्थिक अडचणीत होतं. कोविडनंतर मोठं नुकसान झालं आणि कर्जाचं ओझं वाढलं. काही वर्षांपूर्वी मुलींचं शिक्षणही थांबल्याचं सांगितलं जात आहे. घरात वाद होत असल्याच्या बाबींचाही तपास सुरू आहे. वडील चेतन कुमार यांनी आर्थिक नुकसान झाल्याची कबुली दिली; मात्र त्याचा आणि मुलींच्या या निर्णयाचा थेट संबंध जोडू नये, असे ते म्हणाले. या घटनेवर अभिनेता सोनू सूद यांनी सोशल मीडियावर भावनिक प्रतिक्रिया दिली. त्यांनी अल्पवयीन मुलांसाठी सोशल मीडिया आणि ऑनलाइन गेमिंगवर कडक निर्बंध असावेत, अशी मागणी केली. मुलांना ‘अल्गोरिदम’पेक्षा पालकांच्या वेळेची आणि मार्गदर्शनाची जास्त गरज आहे, असेही ते म्हणाले.