शहर परिवर्तन कक्ष...

 

पावसाळ्यात खड्डे बुजविण्याचे सांगून अर्धवट कामे केलेल्या महापालिका प्रशासनाने ‌‘पुणे ग्रॅण्ड टूर‌’च्या वेळीदेखील शहरातील रस्तेदुरुस्तीचा देखावा केला आणि ज्या भागात रस्ते बरे होते, तेथून आंतरराष्ट्रीय सायकलपटूंना फिरवून वेळ मारून नेल्याचेदेखील नागरिकांना ज्ञात आहे. आता महापौरांना किंवा लोकांनी निवडून दिलेल्या प्रतिनिधींना दाखविण्यासाठी किंवा त्यांच्या पुढे-मागे करण्यासाठी शहर परिवर्तन कक्ष स्थापन करून शहरात हे कोणते असे लक्षणीय परिवर्तन घडविणार आहेत, हा प्रश्नच आहे.

 

पुणेकर नागरिकांना खरेच बुद्धू बनवायचे की, नागरिकांना शहाणे समजून पुढे जायचे हेदेखील लवकरच कळेल, असे म्हणायला हरकत नाही.

 

 

पुणे-मुंबई महामार्गावर गॅस टँकर उलटला काय आणि जो काही कल्लोळ झाला, ज्या काही आर्थिक उलाढाली ठप्प झाल्या, त्या आपल्या प्रगतीतील कामात असलेल्या अनास्था-दुरवस्था दाखविणाऱ्या ठरल्या आहेत. हे एक अनादर्श उदाहरण असले, तरी यानिमित्ताने अनेक अशी कामे अतिशय दूरदृष्टी ठेवून करावी लागणार आहेत. भावी पिढीला आणि आताच्या नागरिकांना कोणताही त्रास होता कामा नये, असे धोरण आखावे लागणार आहे. अलीकडील काळात शहरातील काही विकासकामे अशीच दिरंगाईची आणि गलथानपणाची होत आहेत, हेदेखील यानिमित्ताने खेदाने अधोरेखित करणे गरजेचे. सिंहगड रस्त्याचे काम अशाच गलथानपणाचाच एक नमुना. खुद्द केंद्रीय राज्यमंत्री, राज्याचे ज्येष्ठ मंत्री आणि अनेकांनी या कामाच्या नियोजनावर जाहीर ताशेरे ओढले आहेत. आता पुन्हा त्या भागातील विकासकामांना पुढे नेण्यासाठी नव्या उड्डाणपुलाचे पाडकाम करावे लागणार आहे, ते अशोभनीयच. शिवाय नागरिकांच्या असुविधांमध्ये भर टाकणारे आहे. एकीकडे महानगर हे जगात अव्वल आणि स्वच्छ-सुंदर करण्याच्या जाहीर वल्गना करायच्या आणि दुसरीकडे केलेल्या विकासकामांवर पाणी फेरायचे, हे आर्थिकदृष्ट्यादेखील कदापि परवडणारे नाही. त्यामुळे भविष्यात असेच बांधकाम-पाडकाम होत राहिले, तर पैशाचा अपव्यय आणि नागरिकांची गैरसोय अशी दुष्टचक्राची मालिका सुरू राहू शकते. त्यामुळे महानगरात होणारी मेट्रो-मार्गाची कामे, मिसिंग लिंकची, वाहतुककोंडी सोडविण्याची, रस्तेदुरुस्तीची, चेंबर्स नीट करण्याची, वृक्षतोडीची, पार्किंग सुविधांची, बांधकाम परवानगी देताना योग्य त्या सोयीसुविधा-उपाययोजनांची, सोसायटी पुनर्निर्माणाची, नदी-सुधार प्रकल्पांची, नालेसफाईंची आदी कामे हाती घेताना नियोजन आणि शहरी विकासाची दूरदृष्टी अत्यावश्यकच!

 

महामार्गावर केवळ टँकर पलटी झाल्यानंतर जी काही दिव्य अशी आव्हाने आणि समस्या, काही गैरसोयी आणि मानसिक त्रास सर्वच नागरिकांना भोगावा लागला; तसा होऊ नये म्हणूनच आता अशा कामांचे नियोजन लक्षपूर्वक करणे अगत्याचे होऊन बसले आहे,जेणेकरून भविष्यात नागरिकांना विकासाचा लाभ मिळेल, ही खात्री आणि आशावाद असला पाहिजे.