Mumbai lift accident : मुंबईत लिफ्टमध्ये भयानक स्फोट: तरुणी आरशात पाहत होती अन् डोळ्याची पापणी लागण्या आधीच झाला स्फोट!

मुंबई: (Mumbai lift accident) मुंबईतील गोरेगाव पश्चिम भागात २ फेब्रुवारी रोजी धक्कादायक घटना घडली. अनमोल टॉवर इमारतीत वाढदिवसाची पार्टी आयोजित करण्यासाठी सजावट सुरू होती. यावेळी लिफ्टमध्ये अचानक हायड्रोजन गॅसने भरलेले फुगे फुटल्याने भीषण स्फोट झाला, ज्यामुळे तिथे उपस्थित लोकांमध्ये धावपळ सुरू झाली. स्फोटाच्या वेळेस लिफ्टमधून एक तरुणी जात होती. त्याचवेळी सजावटीसाठी काम करणारा युवक फुग्यांसह लिफ्टमध्ये आला. अवघ्या काही सेकंदांत फुगे फुटल्यामुळे लिफ्ट आगीत वेढली गेली. आगीचा प्रादुर्भाव इतका जबरदस्त होता की परिसरातील लोक धुर आणि ज्वालांच्या प्रभावाने हादरले.

 

सुदैवाने, लिफ्टचे दरवाजे बंद नव्हते, त्यामुळे तीन जण बाहेर पळत आले, मात्र त्यांना आगीच्या झळांमुळे होरपळले. संपूर्ण घटना लिफ्टमधील सीसीटीव्ही कॅमेऱ्यात कैद झाली असून, ती पाहून इमारतीतील इतर नागरिकही हादरले आहे.

हायड्रोजनच्या फुग्यांचा स्फोट का होतो?

 

तज्ज्ञांचे म्हणणे आहे की, हायड्रोजन हा अत्यंत ज्वलनशील गॅस असून, बंद जागेत किंवा लिफ्टसारख्या ठिकाणी त्याचा वापर केला तर गंभीर अपघात होऊ शकतो. जर लिफ्टचे दरवाजे बंद असते किंवा लोक वेळेत बाहेर पळ काढू शकले नसते, तर ही घटना प्राणघातक ठरू शकली असती. सोसायटी प्रशासनाने आणि नागरिकांनी अशा प्रकारच्या दुर्घटनांपासून बचावासाठी सतत जागरूक राहावे, फुग्यांची योग्य तपासणी करावी, आणि लिफ्ट किंवा बंद जागेत ज्वलनशील वस्तू ठेवण्यास मनाई करावी, असे आवाहन केले आहे. तसेच, सजावट करताना किंवा कार्यक्रमाच्या तयारीत सुरक्षा नियमांचे काटेकोर पालन करणे अत्यंत गरजेचे आहे.

 

घटनेवेळी उपस्थित असलेले लोक सांगतात की, काही सेकंदात झालेला स्फोट पाहून सर्वजण हादरले. या घटनेत जीवितहानी झाली नाही, मात्र होरपळल्यामुळे तीन जणांना रुग्णालयात उपचार घ्यावे लागले आहे. हायड्रोजनसारख्या ज्वलनशील गॅसच्या वापरामुळे लहान अपघातही गंभीर बनू शकतो, त्यामुळे नागरिकांनी आणि इमारतीच्या व्यवस्थापनाने सतत खबरदारी घ्यावी. गोरेगावमधील ही घटना एक गंभीर इशारा ठरली आहे की, सुरक्षा नियम पाळणे आणि आग किंवा स्फोट होण्याची शक्यता कमी करण्यासाठी योग्य खबरदारी घेणे अत्यावश्यक आहे.