भारत-फ्रान्स सहकार्याची नांदी! मॅक्रॉन -मोदी चर्चेनंतर 'विशेष जागतिक धोरणात्मक भागीदारी'ची घोषणा

पंतप्रधान नरेंद्र मोदी म्हणाले की, "भारत-फ्रान्स भागीदारीला कोणत्याही सीमा नाहीत. या दोन्ही देशांतील भागीदारी खोल महासागरांपासून सर्वात उंच पर्वतांपर्यंत पसरलेली असेल. जग अनिश्चिततेच्या काळातून जात असताना, भारत-फ्रान्स भागीदारी जागतिक स्थिरतेसाठी एक शक्ती बनेल, भारत-फ्रान्सच्या द्विपक्षीय संबंधात संरक्षण, स्वच्छ ऊर्जा, अवकाश आणि उदयोन्मुख तंत्रज्ञानातील सहकार्यावर भर दिला जाईल. हा उपक्रम उद्योग, स्टार्टअप आणि एमएसएमई यांना जोडेल. विद्यार्थी आणि संशोधकांमधील देवाणघेवाणीला प्रोत्साहन देईल आणि फ्रान्ससोबत संयुक्त करारासाठी नवीन केंद्रे स्थापन करेल.

गेल्या वर्षी फ्रान्सच्या दौऱ्यादरम्यान मार्सेलिस शहराच्या भेटीचा उल्लेख करत पंतप्रधानांनी इतिहास, सांस्कृतिक वारसा आणि सामायिक मूल्यांनी दोन्ही देशांना जोडल्याचे सांगितले. मार्सेलिस हे फ्रान्सचे सर्वात मोठे बंदर असून, पहिल्या महायुद्धाच्या काळात भारतीय सैनिकांनी याच ठिकाणाहून युरोपमध्ये पाऊल ठेवले होते. मोदींनी मार्सेलिस भेटीच्या आठवणींना उजाळा देताना राष्ट्राध्यक्ष मॅक्रॉन यांच्यासमोर स्वातंत्र्यवीर सावरकर यांच्या मार्सेलिसमधील ऐतिहासिक समुद्रउडीची आठवण करून दिली आणि भारताच्या स्वातंत्र्यलढ्यातील त्यांच्या शौर्याचा गौरव केला.(PM Modi - Macron Meet)