Pune Municipal Corporation: सर्वांत कमी वयाची नगरसेविका 'सई'

पुणे : (Pune Municipal Corporation) अवघ्या 22 वर्षांच्या सई थोपटे हिच्या उमेदवारीने राजकीय वर्तुळाचं लक्ष वेधून घेतलं आहे. पुण्यातील प्रभाग क्रमांक 36 (क) मधून भारतीय जनता पक्षाकडून सई थोपटे हिला महानगरपालिकेचं अधिकृत तिकीट देण्यात आलं असून, ती सध्या सर्वांत तरुण उमेदवार ठरली. सई थोपटे सध्या पुण्यातील नामांकित सिम्बायोसिस महाविद्यालयात ‌‘बीबीए‌’च्या अंतिम वर्षात शिक्षण घेत असून महाविद्यालयात वर्ग सुरू असतानाच तिला पक्षाकडून फोन आला आणि उमेदवारी जाहीर झाल्याची माहिती मिळाली होती. यानंतर दै. ‌‘मुंबई तरुण भारत‌’शी बोलताना सईने “आपल्याला पक्षाने घेतलेल्या या निर्णयामुळे खूप आनंद झाला,” अशी भावना व्यक्त केली. त्यानंतर तिने प्रचारकार्यात स्वतःला झोकून दिले आणि आपल्या कर्तृत्वावर हे यश खेचून आणले. त्यामुळे पुणे महापालिकेत ती सर्वांत कमी वयाची नगरसेवक म्हणून उपस्थित असणार आहे. (Pune Municipal Corporation)

सई थोपटे गेल्या अनेक वर्षांपासून ‌‘अखिल भारतीय विद्यार्थी परिषदे‌’शी सक्रियपणे जोडलेली आहे. विद्यार्थी चळवळीच्या माध्यमातून तिने पुण्यात विविध आंदोलनं, सामाजिक उपक्रम, जनजागृती कार्यक्रम आणि संघटनात्मक जबाबदाऱ्या सांभाळल्या आहेत. महाविद्यालयीन विद्यार्थ्यांचे प्रश्न, शैक्षणिक सुविधा, करिअरच्या संधी, तरुणांचे हक्क यांवर तिने सातत्याने ठाम भूमिका मांडली आहे. विद्यार्थ्यांमध्ये काम करताना मिळालेला अनुभव, संवादकौशल्य आणि संघटन क्षमता यांमुळेच तिचं नेतृत्व अधिक ठळकपणे पुढे आलं. (Pune Municipal Corporation)

उल्लेखनीय म्हणजे, सई थोपटे हिला राजकारणाचा वारसा लाभलेला आहे. तिचे वडील प्रशांत थोपटे हे मागील अनेक वर्षांपासून भाजपचे सक्रिय पदाधिकारी आहेत. पर्वती विधानसभा मतदारसंघात त्यांनी उपाध्यक्ष, सरचिटणीस, विधानसभा निवडणूक संयोजक अशा विविध जबाबदाऱ्या यशस्वीपणे सांभाळल्या आहेत. पर्वती, सहकारनगर आणि धनकवडी परिसरात घराघरांत पक्ष पोहोचवण्यात त्यांचा मोठा वाटा आहे. त्यांच्या पक्षनिष्ठेची दखल घेत पर्वतीच्या आ. माधुरी मिसाळ यांनी सई थोपटे हिला पुणे महानगरपालिकेत प्रतिनिधित्वाची संधी दिल्याचं बोललं जात आहे. (Pune Municipal Corporation)