Raj Thackeray : मनसे पक्षाच्या बदलत्या भूमिका! स्थापनेपासून ते आत्तापर्यंत...

 

 

 

Raj Thackeray : गेल्या वर्षभरात महाराष्ट्राच्या राजकारणात सर्वाधिक गाजलेला मुद्दा म्हणजे ठाकरे बंधूंचे मिलन. तब्बल वीस वर्षांनंतर उद्धव ठाकरे आणि राज ठाकरे एकत्र येत दोघांनी मुंबई महापालिका निवडणूक एकत्र लढवण्याचा निर्णय घेतला. महाराष्ट्र आणि मुंबईच्या अस्मितेसाठी एकत्र येण्याचा निर्णय घेतल्याचे दोघांकडूनही वारंवार सांगण्यात येत आहे. मात्र या निर्णयाच्या पार्श्वभूमीवर राज ठाकरे आणि त्यांच्या मनसे पक्षाच्या स्थापनेपासून ते आतापर्यंत बदलत्या भूमिकांची पुन्हा एकदा चर्चा सुरु झाली. मनसे पक्षाच्या स्थापनेपासून राज ठाकरे यांच्या धोरणांमध्ये बदल होत गेल्याचा आरोप अनेकदा केला जातो. या पार्श्वभूमीवरच राज ठाकरे यांनी मनसेची स्थापना केल्यापासून त्यांनी आजपर्यंत नेमक्या कोणत्या भूमिका घेतल्या? याबाबत जाणून घेऊयात....

 

२७ नोव्हेंबर २००५. हा दिवस केवळ मुंबईच नव्हे तर महाराष्ट्राच्या राजकारणाला कलाटणी देणारा दिवस ठरला. महाराष्ट्र टाइम्स या वृत्तपत्राच्या मुंबई आवृत्तीच्या पहिल्या पानावरील आठ कॉलमी बातमीचा मथळा होता – ‘राज ठाकरेंचा शिवसेनेला अखेरचा जय महाराष्ट्र’. या बातमीवर काही वेळातच स्वत: राज ठाकरेंनी शिक्कामोर्तब केला. बातमीनंतर ‘कृष्णकुंज’बाहेर राज यांच्या समर्थकांची गर्दी जमा झाली होती. उद्धव ठाकरे आणि त्यांच्याभोवतीची चार कारकुनांची टोळी शिवसेना संपवत आहे, असा आरोप राज यांनी पक्ष सोडताना केला. यावेळी गर्दीसमोर येत राज ठाकरे म्हणाले होते की, “माझं भांडण माझ्या विठ्ठलाशी नाही, तर त्याच्या आजूबाजूच्या बडव्यांशी आहे...”राज ठाकरेंचं हे वाक्य महाराष्ट्राच्या राजकीय इतिहासात नोंदवले गेले. त्यांच्या या एका वाक्यावरून त्यांचा रोख हा उद्धव ठाकरे यांच्यासह शिवसेनेतील काही नेत्यांकडे होता? हे स्पष्ट झाले होते.

 

राज ठाकरे शिवसेनेत असताना प्रमुख नेते होते. त्या वेळच्या शिवसेनेचा झंझावत अशी राज ठाकरेंची प्रतिमा होती.यामुळे त्यांच्याकडे भविष्यात सेनेचं नेतृत्व त्यांच्याकडे असेल असं अनेकांना वाटायचं. मात्र, त्यानंतर पक्षांतर्गत राजकारण वाढलं आणि राज ठाकरेंची शिवसेनेत घुसमट वाढत गेली. यातून या बंडाची सुरुवात झाली. या सर्व घडामोडीनंतर राज ठाकरे यांनी मराठी माणसाच्या हक्कासाठी लढण्याचं जाहीर केलं आणि पुढे ९ मार्च २००६ रोजी मंत्रालयासमोरील यशवंतराव चव्हाण सेंटरमध्ये नव्या पक्षाची - महाराष्ट्र नवनिर्माण सेनेची घोषणा केली आणि पक्षध्वज जारी केला. या घटनेला आता २० वर्षे पूर्ण होतील. ‘जगाला हेवा वाटेल’ असा महाराष्ट्र घडवू पाहणाऱ्या राज ठाकरेंना २० वर्षांनंतरही सत्तेचा सूर का गवसत नाहीये? असा प्रश्न अनेकांना पडतो.

 

 

 

अनेक राजकीय विश्लेषक सांगतात की, राज-उद्धव यांनी एकत्र येण्यासाठी बराच काळ घेतला, त्यातही जागा वाटपात राज ठाकरेंना काही मानाचे स्थान मिळालेले नाही. त्यामुळे अनेक शिलेदार नाराज आहेत. राज ठाकरेंनी शीवतीर्थावरील सभेतल्या भाषणातून आपल्या भविष्यातील राजकारणाची चुणूक दाखवून दिली आहे. उद्धव ठाकरे आणि किचन कॅबिनेटमुळे त्यांना सोडून जे जूने जाणते गेलेत, त्यांच्याबद्दल त्यांनी पहिल्यांदाच टीका केलेली नाही. त्यांना परत घेण्याविषयीचा जाहीर उल्लेखही त्यांनी केला आहे. राज ठाकरेंचा पक्ष हा स्वतंत्र आहे, त्यामुळे या निवडणूकीत त्यांची जादू चालली तर आणि चालली नाही तरीही मनसेचे अस्तित्व राज ठाकरे संपू देणार नाहीत. आपल्या स्थानिक कार्यकर्त्यांना बळ देण्याचा प्रयत्न पुन्हा राज करतील यात शंका नाही. त्यासाठी उद्धव ठाकरेंशी पुन्हा वैर घ्यावं लागलं तरीही. कारण राज ठाकरेंच्या पक्षाचा आजवरचा इतिहास पाहता, मराठी, हिंदूत्व अशा भूमिका त्यांच्या राहिल्या आहेत. सत्तेत असलेल्या पक्षांशी ते जुळवून घेण्याचा प्रयत्न कायम करतात. उद्धव ठाकरेंचं मराठी आणि अदानीचं नाणं यावेळी चाललं नाही तर पुन्हा एकदा महाराष्ट्राला नवं समीकरण पहायला लागू शकतं, अशी शक्यता नाकारता येत नाही!