मुंबईच्या पुनर्विकासावर ठाकरेंना पोटशूळ का?

 

मुंबई : ( uddhav thackeray and raj thackeray ) मुंबईतील विकास प्रकल्पांवरून ठाकरे बंधूंची टीका पुन्हा एकदा चर्चेत आली आहे. धारावी पुनर्विकास प्रकल्पावर बोलताना उद्धव ठाकरे यांनी, “पुनर्विकासाच्या नावाखाली अर्धी मुंबई अदानींच्या दिली आहे. पात्र-अपात्रचा खेळ करून संपूर्ण झोपडपट्टी बाहेर काढायची आणि धारावीत मोठे टॉवर उभारायचे आहेत. धारावीच्या शेजारी बुलेट ट्रेन स्टेशन कशासाठी?” असा सवाल उपस्थित केला.

 

मात्र, राज्य सरकारकडून राबविण्यात येणाऱ्या धारावी पुनर्विकास प्रकल्पाचा उद्देश लाखो धारावीकरांच्या जीवनात आमूलाग्र बदल घडवून आणण्याचा आहे. या प्रकल्पात पक्की घरे, मूलभूत सुविधा आणि चांगले जीवनमान देण्याचे उद्दिष्ठ आहे. याचसोबत मुंबई हाती घेण्यात आलेले सर्व पुनर्विकास प्रकल्प हे अनेक वर्षांपासून प्रतीक्षेत असणाऱ्या इमारतींचे पुनर्विकास प्रकल्प आहे. ज्यातून लाखो मराठी मुंबईकरांना आहे त्याच जागेवर नवे पक्के आणि मोठे घर मिळेल. बुलेट ट्रेन ही मुंबईचे आर्थिक केंद्र असणाऱ्या बीकेसीतून जाते. ज्यामुळे याभागात गुंतवणुकीला वेग आहे.

 

 

 

 

मुंबईतील पार्किंग समस्येवर बोलताना राज ठाकरे यांनी मुख्यमंत्री देवेंद्र फडणवीस यांच्यावर टीका केली. “मुंबईतील मैदानांच्या खाली ५०० ते १००० गाड्या पार्क करता येतील, अशी भूमिगत पार्किंग योजना आम्ही मांडली होती. आश्वासन मिळाले, पण पुढे काहीच झाले नाही,” असे राज ठाकरे म्हणाले. मात्र, महालक्ष्मी रेसकोर्सखाली प्रस्तावित कार पार्किंगला त्यांचेच पुतणे, आमदार आदित्य ठाकरे यांनी तीव्र विरोध केला होता, याकडे त्यांनी सपशेल कानाडोळा केला आहे.

 

 

वाहतूक कोंडीच्या मुद्द्यावर संयुक्त मुलाखतीत बोलताना ठाकरे बंधूंनी मुंबईत वाहन नोंदणीवर बंधन आणण्याची भूमिका मांडली. मात्र, याच वेळी ठाकरे बंधूंकडे कोट्यवधी रुपयांच्या आलिशान गाड्या असल्याचा मुद्दा विरोधकांनी उपस्थित केला असून, “सामान्य मुंबईकरांसाठी नियम आणि नेत्यांसाठी सवलत का?” असा प्रश्न उपस्थित केला जात आहे. मुंबईच्या विकासाला गती द्यायची की मर्यादा घालायच्या, पुनर्विकास हवा की विरोध या प्रश्नांवर ठाकरे बंधू आणि राज्य सरकार यांच्यातील राजकीय संघर्ष आणखी तीव्र होण्याची चिन्हे दिसत आहेत.