एसटीच्या मोबाईल ॲपला प्रवाशांचा वाढता प्रतिसाद ; एसटीचे ऑनलाईन आरक्षणास प्रवाशांची पसंती

मुंबई, राज्य परिवहन महामंडळाच्या (एसटी) मोबाईल ॲपला प्रवाशांकडून प्रतिसाद वाढला असून या ॲपचे सुमारे १० लाख वापरकर्ते आहेत. दिवसेंदिवस ही संख्या वाढतेच आहे. प्रामुख्याने ऑनलाईन पद्धतीने आरक्षण करण्यासाठी या मोबाईल अप्लिकेशनचा सर्वाधिक वापर होत आहे.

दि.१ एप्रिल २०२५पासून सुरू केलेल्या नवीन MSRTC BUS RESERVATION ॲपला प्रवाशांचा उदंड प्रतिसाद मिळत आहे. मार्च-२०२५ मध्ये ३ लाख ९४ हजार प्रवाशी जुन्या मोबाईल ॲपचा वापर करत होते. सुधारित ॲप आल्यानंतर मे-२०२५ मध्ये सुमारे ६ लाख ७२ हजार प्रवाशांनी नवीन मोबाईल ॲपचा वापर केला आहे. सध्या १० लाख वापरकर्त्यापैकी सरासरी दरमहा ५ लाख प्रवासी सुधारित मोबाईल ॲपवरून तिकीट काढत आहेत.

तब्बल १ लाख २५ हजार प्रतिक्रिया

ॲप डाऊनलोड करणाऱ्या प्रवाशांनी आपला अनुभव, ॲप बद्दलच्या सुचना, तक्रारी या बाबतीत भरभरून प्रतिक्रिया दिलेल्या आहेत. अर्थात , वापरकर्त्यांच्या तक्रारी व सूचना या संदर्भात काही आव्हानेही आहेत. यामध्ये नेटवर्क कव्हरेज कमी असलेल्या ग्रामीण भागात रिअल-टाइम माहिती व डिजिटल पेमेंटची सेवा सतत उपलब्ध नसल्याचे तक्रारीत दिसून येतात. तसेच, ज्येष्ठ नागरिक किंवा तांत्रिकदृष्ट्या पारख नसलेल्या प्रवाशांसाठी ॲपचा वापर अवघड असल्याचेही काही प्रतिक्रिया आहेत. ग्रामीण भागांतील नेटवर्क समस्या दूर करण्यासाठी एसटी महामंडळाने स्थानिक सुविधांचा विचार करून ॲपचे UI/UX अधिक सुलभ बनवण्याच्या दिशेने काम सुरू केले आहे, अशी माहिती महामंडळाने दिली आहे.

एसटीच्या मोबाईल ॲपला प्ले स्टोअर ॲप मध्ये ४.६ स्टार चे रेटिंग मिळाले आहे. अर्थात, या ॲपचा मुख्य हेतू प्रवाशांना बसची आरक्षण सेवा अधिक सुलभ पद्धतीने उपलब्ध करणे असा आहे. पारंपरिक तिकीट खरेदी व थेट बस स्थानकावर अवलंबून राहण्याऐवजी प्रवासी आता त्यांच्या स्मार्टफोनवरून तिकीट खरेदी करू शकतात, प्रवासाची माहिती तपासू शकतात.

- प्रताप सरनाईक
परिवहन मंत्री तथा अध्यक्ष, एस टी महामंडळ