अटल सेतूवर खड्डा ! कंत्राटदाराला १ कोटींचा दंड : एमएमआरडीएकडून अटल सेतूची पाहणी

मुंबई, मुंबई ते नवी मुंबई हा प्रवास जलद करणाऱ्या अटल सेतूवर नवी मुंबईच्या दिशेने जाणाऱ्या मार्गावर काही ठिकाणी खड्डे पडल्याच्या काही चित्रफिती समाजमाध्यमात व्हायरल झाल्या. हे पाहता मुंबई महानगर प्रदेश विकास प्राधिकरणाच्या पथकाने अटल सेतूची पाहणी केली. काही ठिकाणी खड्डे आढळून आल्याने कंत्राटदाराला तब्बल एक कोटींचा दंड ठोठावला असल्याची माहिती एमएमआरडीएने दिली आहे.

दरम्यान, एमएमआरडीएने दिलेल्या माहितीनुसार महानगर प्रदेश विकास प्राधिकरणाचे आयुक्त डॉ. संजय मुखर्जी यांच्या मार्गदर्शनात शुक्रवार,दि.१९ रोजी अतिरिक्त महानगर आयुक्त व प्रकल्प प्रमुख विक्रम कुमार यांनी २२ किमी लांबीच्या संपूर्ण अटल सेतूची म्हणजेच मुंबईकडे आणि नवी मुंबईच्या दिशेने जाणाऱ्या मार्गाची पाहणी केली. या पाहणीत एमएमआरडीएच्या पथकाने नवी मुंबईकडे जाणाऱ्या मार्गावरील केवळ २ किमीच्या मर्यादित पट्ट्यात (कि.मी. १४ ते १६ दरम्यान) काही ठिकाणी पृष्ठभागावर किरकोळ झीज झाल्याचे निदर्शनास आणले. याचे प्रमुख कारण म्हणजे सतत पडणारा जोरदार पाऊस व अविरत वाहतूक प्रवाह यामुळे ही झीज झाली असल्याचे नमूद करण्यात आले आहे. या पथकाने कंत्राटदार देवू (Daewoo)– टाटा इन्फ्रास्ट्रक्चर प्रोजेक्ट्स यांना या सेतूवरील हा पृष्ठभाग दुरुस्त करण्याचे काम पुढील पाच दिवसांत पूर्ण करण्याचे निर्देश दिले आहेत. हे काम वेळेत पूर्ण झाले नाही तर कंत्राटदाराविरुद्ध अधिक कठोर कारवाई करण्यास स्पष्टपणे सांगण्यात आले आहे.

अटल सेतू प्रवासासाठी सुरक्षित

एमएमआरडीएच्या पथकाने स्पष्ट केले की, अटल सेतू रचनात्मक दृष्ट्या भक्कम व सुरक्षित असून, या महत्त्वाच्या प्रकल्पाच्या गुणवत्तेचे व विश्वासार्हतेचे पालन करण्यासाठी एमएमआरडीए कटिबद्ध आहे. नागरिकांना वेळेवर कारवाई व कठोर देखरेखीची हमी देण्यात येत आहे.

कंत्राटदारावर करण्यात आलेली कारवाई

- कंत्राटदाराला सध्या रु. १ कोटीचा दंड

- जानेवारी २०२६मध्ये संपणारी डिफेक्ट लायबिलिटी पिरियड १ वर्षासाठी वाढविला

- पावसाळा संपल्यानंतर प्रभावित भाग नव्याने तयार करणार

- कंत्राटदाराला स्वखर्चाने खर्चावर डेंस बिट्युमिनस मॅकॅडम व ॲस्फाल्ट काँक्रीटचा वापर करून करण्यात येईल.