मुख्यमंत्री उद्योजकता व नाविन्यता महाफंड योजनेअंतर्गत जास्तीत जास्त रोजगार निर्मिती मंत्री मंगलप्रभात लोढा ; ५ लक्ष ते १० लक्षपर्यंत कर्ज सहाय्य दिले जाणार

मुंबई : महाराष्ट्र स्टार्टअप, उद्योजकता व नाविन्यता धोरण २०२५ मध्ये 'मुख्यमंत्री उद्योजकता व नाविन्यता महाफंड' योजना राबविण्यात येणार असून याद्वारे जास्तीत जास्त रोजगार निर्मिती करणार असल्याचे कौशल्य विकास मंत्री मंगलप्रभात लोढा यांनी सांगितले. गुरुवार, ७ ऑगस्ट रोजी मंत्रालयात आयोजित पत्रकार परिषदेत ते बोलत होते.

मंत्री मंगलप्रभात लोढा म्हणाले की, "महाराष्ट्र स्टार्टअप, उद्योजकता व नाविन्यता धोरण २०२५ मध्ये 'मुख्यमंत्री उद्योजकता व नाविन्यता महाफंड' योजना राबविण्यात येणार आहे. विविध तंत्रशिक्षण प्राप्त ३० लाख युवक-युवतींची शासनाकडे नोंद आहे. या सर्वांना ईमेल करून त्यांची एआयद्वारे परीक्षा घेण्यात येईल. यामध्ये पाच लाख युवक-युवतींना विविध परिक्षांती निवडण्यात येईल. यातुन पुन्हा चाळणी करून १ लाख उमेदवारांची निवड मूल्यांकन चाचण्या, स्पर्धा आणि हॅकाथॉनच्या माध्यमातून केली जाईल. अंतिम टप्प्यात २५ हजार निवडक उमेदवारांना तांत्रिक सहाय्य, आर्थिक मदत आणि प्रशिक्षण देऊन यशस्वी उद्योजक, स्टार्टअप्स तयार करण्याचे उद्दिष्ट आहे."

"महाराष्ट्र स्टार्टअप, उद्योजकता आणि नाविन्यता धोरण २०२५ ला मान्यता देण्यात आली असून या धोरणाची अधिकृत अंमलबजावणी करण्यात येणार आहे. महाराष्ट्र राज्य नाविन्यता सोसायटी मार्फत राबविले जाणार आहे. या धोरणाद्वारे महाराष्ट्राला भारतातील सर्वात गतिशील आणि भविष्यवेधी स्टार्टअप केंद्र म्हणून उभारण्याचा उद्देश आहे. या धोरणात पुढील पाच वर्षांसाठी महत्त्वाकांक्षी दृष्टिकोन मांडण्यात आला असून १.२५ लाख उद्योजक घडवणे आणि ५० हजार स्टार्टअपना मान्यता हे धोरणाचे उद्दिष्ट आहे," असे त्यांनी सांगितले.

तसेच "यात शहरी, ग्रामीण, महिला आणि युवा उद्योजकांसह सर्व क्षेत्रांतील उदयोन्मुख तंत्रज्ञान आणि वंचित समुदायांवर लक्ष केंद्रित केले जाईल. या धोरणातील एक महत्त्वाचा घटक म्हणजे निवडलेल्या उमेदवारांना वित्तीय संस्थांच्या भागीदारीतून ५ लक्ष ते १० लक्षपर्यंत कर्ज सहाय्य दिले जाईल. ५ वर्षांच्या कालावधीसाठी ५०० कोटी रुपयांचा निधी उभारला जाईल. महाराष्ट्र स्टार्टअप वीक अंतर्गत निवड झालेल्या स्टार्टअप्सना शासन विभागांसोबत थेट काम करण्याची संधी मिळेल आणि २५ लाखांपर्यंतचे प्रायोगिक तत्वावर कार्यादेश दिले जातील. राज्यातील प्रत्येक विभाग आपल्या वार्षिक तरतुदीपैकी ०.५ टक्के निधी नाविन्यता आणि उद्योजकतेसाठी उपलब्ध करेल," असेही त्यांनी सांगितले.

आयटीआय मध्ये २० नवीन अभ्यासक्रम

"आयटीआयमध्ये २० नविन शॉर्ट टर्म कालावधीचे अभ्यासक्रम सुरू करणार आहेत. १५ सप्टेंबर पासून आयटीआयमध्ये तांत्रिक शिक्षणासोबत इतर अनुषंगिक व्यक्तीमत्व विकासाचे अभ्यासक्रम सुरू होणार आहेत. यामुळे विद्यार्थ्यांना रोजगार मिळविण्यासाठी अधिकचे कौशल्य प्राप्त होतील.

आयटीआयमध्ये कोणते अभ्यासक्रम असतील?

व्यवस्थापन क्षेत्रातील बिझनेस अ‍ॅनालिटिक्स - चार महिने मार्केटिंग मॅनेजमेंट - तीन महिने
प्रॉडक्शन मॅनेजमेंट - साडे तीन महिने
फायनान्शियल मॅनेजमेंट - तीन महिने
बिहेव्हियरल मॅनेजमेंट - साडे तीन महिने

सॉफ्ट स्किल्स मध्ये अ‍ॅडव्हान्स्ड कम्युनिकेटिव इंग्लिश अ‍ॅण्ड प्रोफेशनल स्किल्स ट्रेनर - तीन महिने
फंडामेंटल्स ऑफ कॉन्टेन्ट रायटिंग - तीन महिने
कम्युनिकेटिव इंग्लिश ट्रेनर - तीन महिन
पर्सनॅलिटी डेव्हलपमेंट अ‍ॅण्ड ग्रूमिंग - साडे तीन महिने
कस्टमर रिलेशनशिप मॅनेजमेंट (CRM) - तीन महिने

सेवा क्षेत्रातील अभ्यासक्रम

अ‍ॅडव्हान्स्ड कोर्सेस इन गार्डनिंग - साडे तीन महिने
इलेक्ट्रिशियन अ‍ॅण्ड प्लम्बिंग - तीन महिने
नर्सिंग - तीन महिने
फ्रंट डेस्क कोऑर्डिनेटर - तीन महिने
हाउसकीपिंग सुपरवायझर - साडे तीन महिने
एआय मशीन लर्निंग डेव्हलपरचा - तीन महिने सोलर पॅनल इन्स्टॉलेशन अ‍ॅण्ड मेंटेनन्स - साडे तीन महिने
ड्रोन टेक्नॉलॉजी अ‍ॅण्ड ऑपरेशन्स - तीन महिने
ईव्ही मेकॅनिक - साडे तीन महिने
इंडस्ट्रियल रोबोटिक्स अ‍ॅण्ड डिजिटल मॅन्युफॅक्चरिंग टेक्निशियन - चार महिने