पंतप्रधान मोदींनी उद्घाटन केलेल्या कर्तव्य भवनाची 'ही' आहेत वैशिष्ट्ये; जाणून घ्या सविस्तर...

नवी दिल्ली : (PM Narendra Modi inaugurates Kartavya Bhavan) पंतप्रधान नरेंद्र मोदी यांनी बुधवारी ६ ऑगस्ट रोजी दिल्लीतील कर्तव्यपथावरील कर्तव्य भवनाचे उद्घाटन केले. दिल्लीतील विविध मंत्रालये आणि विभागांना एकाच ठिकाणी एकत्र आणण्यासाठी कर्तव्य भवन उभारण्यात आले आहे. कार्यक्षमता, नवोन्मेष आणि सहकार्याला प्रोत्साहन देण्यासाठी त्याची रचना करण्यात आली आहे.

या कर्तव्य भवनात गृह मंत्रालय, परराष्ट्र मंत्रालय, ग्रामीण विकास मंत्रालय, सूक्ष्म, लघु आणि मध्यम उद्योग मंत्रालय, कार्मिक आणि प्रशिक्षण विभाग, पेट्रोलियम आणि नैसर्गिक वायू मंत्रालय/विभाग आणि प्रमुख वैज्ञानिक सल्लागार (पीएसए) यांची कार्यालये असतील.कर्तव्य भवन-३ हे एक अत्याधुनिक कार्यालय संकुल आहे. संकुलाचे बांधकाम क्षेत्रफळ १.५ लाख चौरस मीटर क्षेत्रात पसरलेले आहे. त्याच्या तळमजल्याचे क्षेत्रफळ ४० हजार चौरस मीटर आहे. सात मजली इमारतीमध्ये बालगृह, योगा कक्ष, वैद्यकीय कक्ष, कॅफे, स्वयंपाकघर आणि बहुउद्देशीय हॉल आहे.