महादेव मुंडेंच्या हत्येचा तपास अखेर २१ महिन्यानंतर सुरू! एसआयटी प्रमुख पंकज कुमावत यांच्याकडून घटनास्थळाची पाहणी

बीड : (Mahadev Munde Case) बीड जिल्ह्यातील परळी येथील व्यापारी महादेव मुंडे यांच्या हत्याप्रकरणाचा तपास अखेर आयपीएस अधिकारी पंकज कुमावत यांच्या नेतृत्वाखाली असणाऱ्या एसआयटीमार्फत सुरु करण्यात आला आहे. याकरिता पंकज कुमावत परळीत दाखल झाले आहेत. २१ महिने उलटूनही या प्रकरणात अद्याप एकही आरोपी पोलिसांना सापडलेला नाही. याशिवाय तब्बल ९ वेळा या प्रकरणातील तपास अधिकारी बदलण्यात आले. यामुळे तपासाला विलंब होत असून आरोपी मोकाट असल्याची तक्रार करत महादेव मुंडे यांच्या पत्नी ज्ञानेश्वरी मुंडे यांनी अनेकवेळा आंदोलनं केली आहेत.

एसआयटीच्या स्थापनेनंतर हत्येच्या तपासाला गती

निःपक्ष आणि पारदर्शक तपासणी होण्यासाठी महादेव मुंडे यांच्या कुटुंबाने प्रकरण एसआयटी कडे देण्यात यावे, अशी मागणी केली होती. यानंतर अखेर मुख्यमंत्र्यांनी एसआयटी स्थापन आदेश दिले आणि या एसआयटी पथकाचे प्रमुख म्हणून पंकज कुमावत यांची नियुक्ती करण्यात आली. महादेव मुंडे यांच्या हत्येच्या कटाचा तपास करण्यासाठी परळी येथील तहसील कार्यालय परिसरात पंकज कुमावत आणि त्यांच्या पथकाने पाहणी केली. यावेळी पंकज कुमावत त्यांनी माध्यमांशी मात्र बोलण्याचे टाळले. आता या प्रकरणाता आरोपी म्हणून कोणाचे चेहरे समोर येणार, हे पाहणे महत्वाचे ठरणार आहे.

गेल्या काही दिवसांपूर्वी महादेव मुंडे यांच्या शवविच्छेदन अहवाल समोर आला होता. या अहवालातून आरोपींनी मुंडेंचा अमानुष छळ करत त्यांना मारल्याचे निष्पन्न झाले आहे. या अहवालानुसार त्यांच्या शरीरावर तब्बल १६ वार करण्यात आल्याचे उघड झाले आहे. या अहवालानंतर ज्ञानेश्वरी मुंडे यांनी पुन्हा एकदा न्यायासाठी आवाज उठवला. त्यासंदर्भात त्यांनी राज्याचे मुख्यमंत्री देवेंद्र फडणवीस यांची भेट घेतली. यावेळी मुख्यमंत्र्यांनी एसआयटी स्थापन करण्याचे आदेश दिले. त्यासोबतच मुंडे कुटुंबियांना न्याय मिळवून देण्याचे आश्वासन दिले.