महाराष्ट्रात ४२ हजार ८९२ कोटींची विक्रमी गुंतवणूक

मुंबई : मुख्यमंत्री देवेंद्र फडणवीस यांच्या उपस्थितीत मंगळवार, १९ ऑगस्ट रोजी विविध गुंतवणुकींसाठी महत्त्वपूर्ण ८ सामंजस्य करार आणि दोन रणनीतिक करार करण्यात आले असून त्यातून राज्यात तब्बल ४२ हजार कोटी रुपयांची गुंतवणूक होऊन २५ हजारांहून अधिक रोजगार निर्मिती होणार आहे.

मुख्यमंत्री देवेंद्र फडणवीस यांच्या उपस्थित मंत्रालयात १० सामंजस्य करारांचे आदानप्रदान करण्यात आले. यावेळी मुख्य सचिव राजेशकुमार, उद्योग सचिव डॉ. पी. अन्बळगन, एमआयडीसीचे मुख्य कार्यकारी अधिकारी पी वेलारासू, विकास आयुक्त दिपेंद्रसिंह कुशवाह तसेच विविध क्षेत्रातील कंपन्यांचे गुंतवणूकदार उपस्थित होते.

याप्रसंगी मुख्यमंत्री देवेंद्र फडणवीस म्हणाले की, "महाराष्ट्र डेटा सेंटर कॅपिटल आणि सौरऊर्जा एकत्रीकरण कॅपिटल म्हणून पुढे येत आहे. अनेक कंपन्या या क्षेत्रांत येत असून उत्पादन क्षेत्रातही मोठी क्रांती घडणार आहे. यूकेसोबत झालेल्या रणनीतिक करारामुळे नवे दरवाजे उघडले असून भारतात अधिक गुंतवणूक होत आहे. हे गुंतवणूकदारांचा आणि पंतप्रधान नरेंद्र मोदी यांच्या नेतृत्वावरील विश्वासाचे द्योतक आहे. गुंतवणूकदारांनी अतिशय ठाम आणि सकारात्मक बांधिलकी दाखवली आहे. महाराष्ट्रात गुंतवणूक सुरळीत होण्यासाठी शासनाची संपूर्ण टीम सुरुवातीपासून शेवटपर्यंत तुमच्यासोबत काम करेल. याशिवाय हायपरलूप प्रकल्पालाही गती मिळत आता आयआयटी मुंबई आणि आयआयटी मद्रास यांच्यामुळे प्रकल्पाला गती मिळत आहे. लॉजिस्टिक, वाहतूक आणि मोबिलिटी क्षेत्रात राज्यात नव्हे, तर संपूर्ण देशात हा प्रकल्प आमूलाग्र बदल घडवणार आहे," असे त्यांनी सांगितले.

यावेळी मुख्यमंत्र्यांच्या उपस्थितीत झालेले ८ सामंजस्य करार आणि २ रणनीतिक करार :
सोलर पॅनेल निर्मितीसाठी ज्युपिटर इंटरनॅशनल लि. या कंपनीसोबत १० हजार ९०० कोटी रूपयांचा गुंतवणूक करार झाला असून यातून ८ हजोर ३०८ रोजगार निर्मिती होणार आहे. रोचक सिस्टिम्स प्रा.लि. या कंपनीसोबत डेटा सेंटर करिता २ हजार ५०८ कोटी रूपयांचा करार झाला. यातून हजार रोजगार निर्मिती होणार आहे. तसेच रोव्हिसन टेक हब प्रा.लि. या कंपनीसोबत डेटा सेंटर या सेक्टरकरिता २ हजार ५६४ कोटी रूपयांचा गुंतवणूक करार असून यातून १ हजार १०० रोजगार निर्मिती होणार आहे. वॉव आयर्न ॲण्ड स्टिल प्रा.लि. यासाठी पोलाद उद्योगाकरिता ४ हजार ३०० कोटी रूपयांचा करार करण्यात आला. यातून १ हजार ५०० रोजगार निर्मिती होईल. वेबमिंट डिजिटल प्रा.लि. या कंपनीसोबत डेटा सेंटरकरिता ४ हजार ८४६ कोटी रूपयांचा गुंतवणूक करार करण्यात आला असून यातून २ हजार ५० रोजगार निर्मिती होणार असल्याचे सांगण्यात येत आहे.

हरित उर्जा क्षेत्रात ४ हजार ७०० कोटींची गुंतवणूक

यासोबतच औद्योगिक उपकरणे क्षेत्राकरिता ॲटलास्ट कॉपको या कंपनीसोबत ५७५ कोटी रूपयांचा करार करण्यात आला असून यातून ३ हजार ४०० रोजगार निर्मिती होणार आहे. हरित उर्जा क्षेत्रात एलएनके ग्रीन एनर्जी या कंपनीसोबत केलेल्या ४ हजार ७०० कोटी रूपयांचा गुंतवणूक करारातून २ हजार ५०० रोजगार निर्मिती होणार आहे. तसेच डेटा सेंटर, लॉजिस्टिक सेंटर रिअल इस्टेट या क्षेत्राकरिता प्रेस्टीज इस्टेट प्रोजेक्ट लि.या कंपनीसोबत १२ हजार ५०० कोटी रूपयांचा गुंतवणूक करार झाला असून ८ हजार ७०० रोजगार निर्मिती होणार आहे. याशिवाय ग्लोबल इंडिया बिझिनेस कॉरिडॉर तर्फे महाराष्ट्रातील युके आणि युरोपमधील गुंतवणूक आकर्षिक करण्यासाठी सहकार्य करण्याचा सामंजस्य करार आणि टीयूटीआर हायपरलूम प्रा.लि. कंपनीकडून जेएनपीटी आणि वाढवण बंदरावर अत्याधुनिक वाहतूक व्यवस्था उभारण्यासंदर्भात करार करण्यात आला आहे.