उत्तर प्रदेशचा 'मुन्नाभाई एमबीबीएस' गजाआड; औषधं लिहून देण्यास सांगितलं अन् बोगस डॉक्टरला पळता भुई थोडी!

लखनौ : (Uttar Pradesh Fake Doctor) उत्तर प्रदेशमधून एक खळबळजनक घटना समोर आली आहे. बस्ती येथील जिल्हा रुग्णालयातील एका बनावट डॉक्टराचा पर्दाफाश करण्यात आला. पोलिसांनी या बनावट डॉक्टरच्या ताब्यात घेतले आहे. एका व्यक्तीने त्याच्या पत्नीला गंभीर अवस्थेत रुग्णालयात दाखल केले असता हा धक्कादायक प्रकार उघडकीस आला आहे.

उत्तर प्रदेशातील बस्ती येथील जिल्हा रुग्णालयातील आपत्कालीन वॉर्डमध्ये एका रुग्णावरील उपचारादरम्यान हा बनावट डॉक्टर पकडला गेला आहे. एका व्यक्तीने त्याच्या पत्नीला रुग्णालयात उपचारासाठी दाखल केले होते. मात्र, यावेळी या बनावट डॉक्टरचा पर्दाफाश करण्यात आला. कुटुंबीयांनी आरोप केला की, तिला जवळपास दोन तास उपचार न देता रुग्णालयात ठेवण्यात आले. मात्र, काही वेळाने तिचा मृत्यू झाला. या दरम्यान बनावट डॉक्टर वैद्यकीय कर्मचाऱ्यांच्या वेशात आपत्कालीन वॉर्डमध्ये फिरत होता.

प्रत्यक्षदर्शीच्या म्हणण्यानुसार, राज कुमार असे त्याचे नाव असून तो डॉक्टरांसारखे कपडे घालून रुग्णालयात वावरत होता. यावेळी त्या बनावट डॉक्टरने मास्क, स्टेथोस्कोप घातलेला होता, एवढंच नाही तर तो वॉर्डमध्येही फिरत होता. तो स्वतःला एक वरिष्ठ डॉक्टर म्हणून सांगत रुग्णांवर उपचार करण्याचा प्रयत्न करत होता. यामध्ये रुग्णालयातील गंभीर प्रकृती असलेल्या रुग्णांचाही समावेश होता. पण याचवेळी एका रुग्णाच्या कुटुंबियाने त्या डॉक्टरला काही औषधे लिहून देण्यास सांगितले. पण त्याने वॉर्डनला विचारून सांगतो असं उत्तर दिलं अन् त्याचा भांडाफोड झाला. त्या डॉक्टरने दिलेल्या उत्तरामुळे कुटुंबियांच्या मनात संशय निर्माण झाला. त्यानंतर त्या डॉक्टरला नातेवाईकांनी पकडून आणि पोलिसांच्या हवाली केले. पोलीस आल्यानंतर बनावट डॉक्टरचा पर्दाफाश झाला.

पोलिसांनी सांगितले की, चौकशी केल्यानंतर असे दिसून आले की तो व्यक्ती बस्ती मेडिकल कॉलेजमध्ये ओटी टेक्निशियनच्या दुसऱ्या वर्षाचा विद्यार्थी होता. दरम्यान, जिल्हा रुग्णालयाचे एसआयसी डॉ. खालिद रिझवान यांनी घटनेची पुष्टी केली आणि सांगितले की, "डॉक्टर असल्याचे भासवून वॉर्डमध्ये एक अज्ञात व्यक्ती उपस्थित असल्याची माहिती मिळाली. लोकांनी त्याला पकडून पोलिसांच्या स्वाधीन केले. लेखी तक्रारीच्या आधारे एफआयआर दाखल केला जात आहे. या घटनेमुळे रुग्णालयातील सुरक्षा आणि आरोग्य कर्मचाऱ्यांच्या पात्रतेवर प्रश्नचिन्ह निर्माण झाले आहे. पोलिसांनी या प्रकरणाचा तपास सुरू केला आहे आणि या बनावट डॉक्टरला कठोर शिक्षा देण्याची मागणी होत आहे.