गडकरी रंगायतनची तिसरी घंटा वाजली , नाट्यगृहाच्या लोकार्पणसमयी उपमुख्यमंत्री एकनाथ शिंदे यांचे वक्तव्य

ठाणे : "गेले काही महिने नूतनीकरणासाठी गडकरी रंगायतनचा रंगमंच सुना होता, पडदा बंद होता. हा पडदा उघडण्याची नाट्यरसिक वाट पहात होते. तो दिवस आज उजाडला. तिसरी घंटा वाजली आहे. नूतनीकृत गडकरी रंगायतनचे लोकार्पण झाले आहे,” असे उपमुख्यमंत्री एकनाथ शिंदे यांनी जाहीर केले. ठाणे शहराचा सांस्कृतिक मानबिंदू असलेल्या राम गणेश गडकरी रंगायतन नाट्यगृहाच्या वास्तूचा भव्य लोकार्पण सोहळा राज्याचे उपमुख्यमंत्री एकनाथ शिंदे यांच्या हस्ते झाले यावेळी ते बोलत होते.

"कलाकारांच्या सूचना लक्षात घेऊन या नूतनीकरणाचे काम झाले आहे. ही वास्तू मोडकळीला आली होती. तिचे पूर्ण रूप या नूतनीकरणाने पालटले आहे. लिफ्ट आली आहे. त्यामुळे आता ही वास्तू आणखी सुंदर आणि दिमाखदार झाली आहे,” असेही उपमुख्यमंत्री शिंदे म्हणाले. यावेळी ज्येष्ठ रंगकर्मी सुहास जोशीही उपस्थित होत्या.

या सोहळ्यास, खा. नरेश म्हस्के, आ. संजय केळकर, आ. अ‍ॅड. निरंजन डावखरे, माजी खा. विनय सहस्रबुद्धे, माजी महापौर मिनाक्षी शिंदे, महापालिका आयुक्त सौरभ राव, जिल्हाधिकारी श्रीकृष्ण पांचाळ, ठाणे जिल्हा परिषदेचे मुख्य कार्यकारी अधिकारी रोहन घुगे, ‘अ. भा. मराठी नाट्य परिषदे’चे विश्वस्त अशोक हांडे, प्रमुख कार्यवाह अजित भुरे, ज्येष्ठ अभिनेते अशोक समेळ, लोककलांचे अभ्यासक प्रकाश खांडगे, अतिरिक्त आयुक्त संदीप माळवी, अतिरिक्त आयुक्त प्रशांत रोडे आदी मान्यवर उपस्थित होते. त्याचबरोबर, प्रेक्षागृहात, रंगकर्मी, ज्येष्ठ माजी नगरसेवक, नागरिक उपस्थित होते.

आयुक्त सौरभ राव यांनी त्यांच्या प्रास्ताविकात गडकरी रंगायतनच्या कामाचा आढावा घेतला. तसेच, ‘अ. भा. मराठी नाट्य परिषदे’चे विश्वस्त अशोक हांडे यांनी कलाकारांनी केलेल्या सूचनांची दखल घेऊन नूतनीकरणाबद्दल महापालिकेचे कौतुक केले.

वयाची ७८ वर्षे आणि रंगभूमीवरील योगदानाची ५२ वर्षे पूर्ण करीत असलेल्या ज्येष्ठ रंगकर्मी सुहास जोशी यांचा याप्रसंगी आयुक्त सौरभ राव यांनी सन्मान केला. रंगायतनच्या नूतनीकरणात योगदान देणार्‍यांमधील महापालिकेचा सार्वजनिक बांधकाम विभागाचे नगर अभियंता प्रशांत सोनाग्रा, उपनगर अभियंता सुधीर गायकवाड, उपनगर अभियंता शुभांगी केसवानी, कार्यकारी अभियंता भगवान शिंदे, गडकरी रंगायतनच्या नावाचे अक्षरसुलेखन करणारे उपायुक्त (जनसंपर्क) उमेश बिरारी, कंत्राटदार रवींद्र चव्हाण आणि सल्लागार हितेन सेठी यांच्यावतीने तेजस्विनी पंडित यांचा गौरव करण्यात आला.

ज्येष्ठ शास्त्रीय गायक मुकुंद मराठे यांच्यासह संपदा माने, तन्वी गोरे, शरण्या शेणॉय, धवल भागवत, श्रीकर कुलकर्णी, प्रतीक फणसे या युवा कलाकारांनी नांदी सादर केली. ठाण्यातील मान्यवर कलाकारांनी ‘फ्लूजन’ हा कलाविष्कार सादर केला. त्यात, पं. विवेक सोनार (बासरी), पं. मुकुंदराज देव (तबला), मोहन पेंडसे (व्हायोलीन), किरण वेहेले (कीबोर्ड), अभिषेक प्रभू (बेस गिटार) आणि सचिन नाखवा (ड्रम्स) हे कलाकार सहभागी झाले.