महात्मा जोतिबा फुले मंडईत मासळी विक्रेत्यांचे पुनर्वसन

मुंबई :छत्रपती शिवाजी महाराज मंडईतील मासळी विक्रेत्यांचे कायमस्वरुपी पुनर्वसन हे महात्मा जोतिबा फुले मंडई पुनर्विकास प्रकल्पातील इमारतीमध्ये करण्यात येत आहे. या नवीन इमारतीमध्ये आवश्यक तसेच अत्याधुनिक अशा सर्व सेवा-सुविधा देखील पुरवण्यात आल्या आहेत, असे मुंबई महानगरपालिका प्रशासनाकडून स्पष्ट करण्यात आले आहे.

मुंबई महानगरपालिका मुख्यालयापासून जवळच असलेल्या छत्रपती शिवाजी महाराज मंडई, या तळघर अधिक तळमजला अधिक ४ मजले अशा स्वरुपाच्या सुमारे ५० वर्षे जुन्या इमारतीचे सन २०१२ मध्ये संरचनात्मक परीक्षण करण्यात आले. त्यानुसार, ही इमारत अतिधोकादायक असल्याचा अहवाल प्राप्त झाला. तसेच, याबाबत दाखल एका जनहित याचिकेवर सुनावणीप्रसंगी इमारतीच्या सुरक्षेबाबत सुनिश्चिती करण्याचे निर्देश उच्च न्यायालयाने दिले. यासर्व पार्श्वभूमीवर, मंडईतील परवानाधारक ३४८ मासळी विक्रेत्यांचे विविध ठिकाणच्या मंडईमध्ये पर्यायी स्थलांतर करुन महानगरपालिका प्रशासनाने जुलै २०२१ मध्ये ही इमारत निष्कासित केली.

ही इमारत अतिधोकादायक जाहीर झाली तेव्हापासून, मंडईतील मासळी विक्रेत्यांचा व्यवसाय अबाधित रहावा, यादृष्टिने स्थानिक आणि लगतच्या परिसरातच त्यांना स्थलांतरित करण्याची विनंती संबंधित मासळी विक्रेते, कोळी बांधव, संबंधित संघटना यांच्यासह लोकप्रतिनिधींनी देखील महानगरपालिकेकडे वेळोवेळी केली. अशावेळी महानगरपालिकेने महात्मा जोतिबा फुले मंडई यापुनर्विकास प्रकल्पामध्ये या मासळी विक्रेत्यांसाठी एका इमारतीची तजवीज केली. पुनर्विकसित नवीन इमारतीमध्ये मासळी विक्रेत्यांचे कायमस्वरुपी पुनर्वसन करण्यात येणार आहे. या इमारतीत वीज, पाणी, प्रसाधनगृह यासारख्या आवश्यक सुविधा उपलब्ध झाल्या आहेत. अग्निशमन सुरक्षा मंजुरी प्राप्त झाली असून इमारत भोगवटा प्रमाणपत्र देखील लवकरच प्राप्त होईल. त्यामुळे या इमारतीमध्ये जागा वाटपाची प्रक्रिया ऑगस्ट २०२५ मध्ये सुरु करण्याचा महानगरपालिका प्रशासनाचा मानस आहे.

मंडईचे देखणेपण वाढणार

शीतगृह (रेफ्रीजरेशन), ७८ चारचाकी वाहन क्षमतेचे वाहनतळ, मालाची चढउतार करण्यासाठी उतार (रॅम्प), धक्का (लोडिंग / अनलोडिंग प्लॅटफॉर्म), सरकता पट्टा (कन्व्हेयर बेल्ट), उद्वाहन (लिफ्ट), सांडपाणी पुनर्प्रक्रिया (एसटीपी/ ईटीपी) यासारख्या सुविधांचा त्यात समावेश आहे. पुरातन वारसा असलेल्या महात्मा जोतिबा फुले मंडईचा पुनर्विकास करताना आतील भागात एक एकर क्षेत्रफळामध्ये हिरवळीचे क्षेत्र (लॅण्डस्केपिंग) देखील राहणार आहे. त्यामुळे मंडईचे देखणेपण वाढेल.