भारतरत्न डॉ. बाबासाहेब आंबेडकर यांच्या स्मारकाच्या अनावरण सोहळ्यासाठी सरन्यायाधीश उद्या मुंबईत!

मुंबई(Chief Justice of Bharat B. R. Gavai at Mumbai): भारतरत्न डॉ. बाबासाहेब आंबेडकर यांच्या स्मारकाचे अनावरण भारताचे सरन्यायाधीश बी. आर. गवई यांच्या हस्ते शनिवार दि. ५ जुलै रोजी सरकारी विधी महाविद्यालय (GLC) मुंबई येथे करण्यात येणार आहे. याकरिता सरकारी विधी महाविद्यालयाच्या आवारात स्मारकाचा अनावरण सोहळ्याचे आयोजन करण्यात आले आहे. यावेळी सरन्यायाधीश बी. आर. गवई यांचा सत्कारही करण्यात येणार आहे.

सरन्यायाधीश बी. आर. गवई यांनी १४ मे रोजी भारताचे सरन्यायाधीश म्हणून पदभार स्वीकारला होता. त्यानंतर ते १८ मे रोजी मुंबई येथील सत्कार संमारभाला आले होते. या कार्यक्रमात राज्याचे मुख्य सचिव आणि पोलिस आयुक्त राज्यशिष्टाचारानुसार(प्रोटोकॉल), या कार्यक्रमाला राज्याचे मुख्य सचिव आणि पोलिस आयुक्त राहणे आवश्यक असूनही ते अनुपस्थित राहिले होते. सरन्यायाधीशांनी या घटनेवर स्वत: हून नाराजी व्यक्त केली होती. यानंतर राज्याचे प्रोटोकॉल मंत्री जयकुमार रावल यांनी या घटनेच्या चौकशीचे आदेश दिले आणि राज्यशिष्टाचाराचे पालन का करण्यात आले नाही, याबाबत चौकशी करुन अहवाल सादर करण्यास सांगितले होते.

सरकारी विधी महाविद्यालयात होणाऱ्या सत्कार समारंभ कार्यक्रमासंबधित महाराष्ट शासनाच्या माहिती आणि जनसंपर्क महासंचालनालयाने परिपत्रक काढून संबधित विभागाला सरन्यायाधीशांच्या दौऱ्याविषयी विशेष सूचना दिल्या आहेत. हा कार्यक्रम शनिवार दि. ५ जुलै रोजी सकाळी ९ वाजता विधी महाविद्यालयाच्या सभागृहात होणार आहे.