...तर मी राजीनामा देईन! 'त्या' व्हिडीओवरून मंत्री माणिकराव कोकाटेंचे स्पष्टीकरण

मुंबई : जर मी ऑनलाईन रमी खेळत असेन आणि मी दोषी सापडलो तर नागपूरच्या हिवाळी अधिवेशनात राजीनामा देईन, असे स्पष्टीकरण मंत्री माणिकराव कोकाटे यांनी दिले आहे. कृषीमंत्री माणिकराव कोकाटे यांचा विधानभवनात रमी खेळतानाचा व्हिडीओ व्हायरल झाल्यानंतर त्यांनी आपल्या मंत्रीपदाचा राजीनामा द्यावा, अशी मागणी करण्यात येत होती.

दरम्यान, मंगळवार, २२ जुलै रोजी पत्रकार परिषद घेत त्यांनी यावर स्पष्टीकरण दिले. मंत्री माणिकराव कोकाटे म्हणाले की, ठहा छोटा विषय आहे. हा विषय एवढा लांबला का? हे मला कळत नाही. मी याआधीही यावर खुलासा केला आहे. ऑनलाइन रमी काय प्रकार आहे हे माहिती आहे का? ऑनलाईन रमी खेळत असताना त्याला मोबाईल नंबर, बँकेचे खाते जोडावे लागते. त्याशिवाय ऑनलाइन रमी खेळता येत नाही. माझे असे कोणतेही खाते किंवा मोबाईल नंबर जोडलेला नाही. ज्या दिवसापासून ऑनलाईन रमी सुरू झाला त्या दिवसापासून मी एक रुपयाचीसुद्धा रमी खेळलेली नाही. मला रमी खेळताच येत नाही. त्यामुळे अशा प्रकारचा आरोप बिनबुडाचा आणि चुकीचा आहे. यामुळे महाराष्ट्रात माझी बदनामी झाली आहे. कारण असताना ज्या राजकीय नेत्यांनी हा आरोप केला आहे, ज्यांना माझी बदनामी केली आहे, त्या सर्वांना मी कोर्टात खेचल्याशिवाय राहणार नाही," असे ते म्हणाले.

पूर्ण व्हिडिओ का दाखवला नाही?

"त्यादिवशी सभागृहात माझी लक्षवेधी होती. मला माझ्या ओएसडीकडून माहिती हवी असेल तर मला एसएमएस किंवा फोन करावा लागतो. त्यांना सभागृहात आत येत नाही. त्यासाठी मी एक मोबाईल मागवला होता. मोबाईल उघडल्यावर त्यावर तो गेम आला. तो गेम सारखा पॉप-अप होतो. मला तो स्कीप करता आला नाही. पण नंतर मी तो गेम स्कीप केला. परंतू, स्किप केल्याचा व्हिडिओ तुमच्यापर्यंत आलाच नाही, तो तुम्ही दाखवलाच नाही. मोबाईलवर अनेक वेगवेगळे गेम येतात. ते स्किप करावे लागतात. पण ते पटकन होत नाहीत. ३० सेकंद ते स्कीप होत नाही. हा व्हिडिओ ११ सेकंदांचा आहे. मी मोबाईल उघडल्यानंतर तो गेम स्किप करण्याचा प्रयत्न करत होतो तेवढ्याच वेळात तो व्हिडिओ शूट केला आहे. त्यावरुन आरोप-प्रत्यारोप सुरु झाले. त्यांनी पूर्ण व्हिडिओ का दाखवला नाही? पूर्ण व्हिडीओ दाखवला असता तर माझ्यावरील आरोपांमध्ये काहीही तथ्य नाही, हे स्पष्ट झाले असते," असेही ते म्हणआले.

ते पुढे म्हणाले की, "मी आता मुख्यमंत्री, उपमुख्यमंत्री, सभापती आणि विधानसभा अध्यक्षांना लेखी पत्र देणार आहे. या संपूर्ण प्रकरणाची सखोल चौकशी होणे आवश्यक आहे. त्यामुळे माझ्या पत्राच्या आधारे आपण चौकशी करावी. जर मी ऑनलाईन रमी खेळत असेन, मी दोषी सापडलो तर नागपूरच्या हिवाळी अधिवेशनात मुख्यमंत्री आणि उपमुख्यमंत्र्यांपैकी कोणीही निवेदन करावे, त्या क्षणाला न थांबता मुख्यमंत्री आणि उपमुख्यमंत्र्याला न भेटता मी राज्यपालांकडे जाऊन माझा राजीनामा देईन. मी काहीही वेडेवाकडे केले नाही. यात जे दोषी असतील त्यांची चौकशी करण्यात यावी," अशी मागणीही त्यांनी यावेळी केली.