मंदिरांचे नियंत्रण आणि व्यवस्थापन हिंदूंच्या हाती हवे : बजरंगलाल बागडा , जळगावात विहिंपच्या केंद्रीय प्रबंध समितीची आंतरराष्ट्रीय स्तरावरील बैठकीला सुरुवात

जळगाव : देशातील जगप्रसिद्ध मंदिरांवर शासनाचे नियंत्रण असून, मंदिरांचे नियंत्रण व व्यवस्थापन हिंदूंकडे देऊन मंदिरात दान येणाऱ्या धनसंपत्तीचा उपयोग हिंदू समाजहितासाठीच व्हावा. तसेच व्यसनाधीन युवक देशासाठी गंभीर मुद्दा आहे. यासाठी बजरंग दल व दुर्गा वाहिनीतर्फे जनजागृतीपर विशेष अभियान राबविले जाईल. यांसह इतर विषयांवर जळगावातील केंद्रीय प्रबंध समितीच्या आंतरराष्ट्रीय स्तरावरील बैठकीत चर्चामंथन होऊन अभियानाची दिशा ठरविली जाईल, असे विश्व हिंदू परिषदेचे राष्ट्रीय महामंत्री बजरंगलालजी बागडा यांनी सांगितले.

जळगावच्या एमआयडीसी परिसरातील बालाणी लॉन्सच्या नवीन इमारतीत अखिल भारतीय विश्व हिंदू परिषदेच्या केंद्रीय प्रबंध समितीची आंतरराष्ट्रीय स्तरावरील बैठक होत आहे. यानिमित्त शुक्रवारी दुपारी बाजारांगलाल बागडा यांनी प्रसारमाध्यमांशी संवाद साधला. याप्रसंगी विश्व हिंदू परिषदेच्या अखिल भारतीय प्रचार समितीचे विजय शंकर तिवारी, देवगिरी प्रांतमंत्री योगेश्वर गर्गे, भय्यालाल आदी उपस्थित होते.

बैठकीत आगामी दोन दिवसांत कोणकोणत्या विषयांवर चर्चामंथन होईल याविषयी बाजारांगलाल बागडा यांनी माहिती दिली. ते म्हणाले, बैठकीला केंद्रीय पदाधिकारी, क्षेत्रीय, सर्व प्रांतांचे पदाधिकारी व कार्यकर्ते सहभागी असून, सुमारे ४०० पदाधिकारी उपस्थित राहतील. हिंदू समाजासमार अनेक आव्हाने आहेत. त्यांना समोरे जाण्याच्या दृष्टीने आगामी कार्यक्रम, अभियानाची रूपरेषा बैठकीत ठरविली जाईल.

पुढे ते म्हणाले, "देशभरातील प्रसिद्ध हिंदू मंदिरांवर राज्य व केंद्र शासनाचे नियंत्रण आहे. मंदिरांचे व्यवस्थापन व नियंत्रण पूर्णतः हिंदू समाजाकडे असावे. मंदिरात येणाऱ्या दान व देणगीरूपी धनसंपत्तीचा उपयोग फक्त हिंदू समाजाच्या कल्याणासाठी केला जावा. ब्रिटिशकालीन कायद्यांमध्ये बदल करून मंदिरे शासनाच्या नियंत्रणातून मुक्त व्हावीत."

युवकांमधील वाढती व्यसनाधीनता चिंताजनक असल्याचे सांगत ते म्हणाले, देशभरातील युवक व्यसनाच्या आहारी जात आहेत. हा विषय आता चिंताजनक झाला आहे. ही देशासमोर मोठी समस्या आहे. युवकांना व्यसनांपासून रोखण्यासाठी राष्ट्रव्यापी नशामुक्ती अभियान राबविले जाईल. अभियानाला अंतिम रूप देण्यासाठी विश्व हिंदू परिषदेचे युवा संघटन, बजरंग दल, दुर्गा वाहिनी प्रामुख्याने सहभाग होईल. याअंतर्गत शाळा- महाविद्यालय व विविध समाजघटकांमध्ये जनजागृतीपर उपक्रम राबविले जातील. यासाठी शासन-प्रशासनासोबत समन्वय बैठका घेण्यात येतील.

जळगावात होत असलेल्या अखिल भारतीय विश्व हिंदू परिषदेच्या केंद्रीय प्रबंध समितीच्या आंतरराष्ट्रीय स्तरावरील बैठकीत हिंदू समाजहितासाठी मंदिरे शासन नियंत्रणमुक्त व्हावीत, युवकांना व्यसनांपासून रोखणे, धर्मांतर या प्रमुख मुद्यांसह विविध विषयांवर चर्चामंथन करीत, शासन-प्रशासनाशी चर्चा करून योग्य निर्णय घेण्यासाठी दिशा ठरविली जाणार आहे. त्यानंतर जनजागृती अभियानासह आवश्यक असल्यास शासन-प्रशासनाला निवेदने आणि आवश्यकतेनुसार आंदोलनही केले जाईल, असे बजरंगलालजी बागडा यांनी सांगितले

देशभरातील धर्मांतर रोखण्याची गरज

धर्मांतरासारख्या गंभीर मुद्द्यावर बोलताना ते म्हणाले, बांगलादेशातून मोठ्या संख्येने घुसखोरी होत असून देशात धर्मांतरणाचे प्रकार वाढले आहेत. हिंदू समाजाची अस्मिता वाचविण्यासाठी अवैध पद्धतीने होणारे धर्मांतर रोखण्याची गरज आहे. अनेक हिंदू बांधवांना वेगवेगळी आमिषे, पैशांची आशा लावून धर्मांतर करण्यासाठी भाग पाडले जाते. ते षड्यंत्र आहे. यासाठी बजरंग दल व दुर्गा वाहिनी यांच्यातर्फे देशभर जनजागृती अभियान राबविले जात आहे. गोमातांचे संरक्षण, युवतींच्या संरक्षणासाठी बजरंग दल व दुर्गा वाहिनी कार्यरत आहेत.