बाप्पाचे आयोजन यंदा धुमधडाक्यात
- राज्य सरकार सहभागी होणार; गणेशोत्सव "राज्य महोत्सव" म्हणून साजरा करण्याची रुपरेषा जाहीर
Total Views |
मुंबई: शतकाहून अधिक काळाची परंपरा असलेल्या गणेशोत्सवाला राज्य महोत्सवाचा दर्जा देण्यात आला आहे. यंदापासून राज्य सरकार थेट सहभागी होऊन हा उत्सव राष्ट्रीय आणि आंतरराष्ट्रीय पातळीवर पोहोचवण्यासाठी विविध उपाययोजना करणार आहे. यासंदर्भातील रूपरेषा सांस्कृतिक कार्यमंत्री ॲड. आशिष शेलार यांनी शुक्रवारी विधानसभेत जाहीर केली.
मंत्री शेलार यांनी आपल्या निवेदनात म्हटले की, महाराष्ट्र ही कला, संस्कृती आणि परंपरेची समृद्ध भूमी आहे. संत-सुधारकांचा, थोरांचा, भक्ती-अध्यात्माचा आणि सर्वसमावेशकतेचा वारसा या भूमीला लाभला आहे. सामाजिक एकरूपता आणि सांस्कृतिक प्रगतीचा पाया गणेशोत्सवाने घातला आहे. घरगुती आणि सार्वजनिक गणेशोत्सवाच्या परंपरांनी महाराष्ट्राच्या सांस्कृतिक आणि सामाजिक समरसतेचे मानबिंदू निर्माण केले आहेत.
या उत्सवाचे पारंपरिक स्वरूप कायम ठेवत आधुनिकतेची जोड देण्यासाठी आणि प्रत्येक नागरिकाला या महोत्सवाशी जोडण्यासाठी राज्य सरकार सुलभकर्ता म्हणून महत्त्वाची भूमिका बजावेल. यामुळे गणेशोत्सवाचे महत्त्व जगभरात पोहोचेल, पर्यटनाला चालना मिळेल आणि महाराष्ट्राच्या समृद्ध परंपरांचे जतन-संवर्धन होईल.
रुपरेषा अशी
- राज्य महोत्सवाच्या एका लोगोचे अनावरण करण्यात येणार
- राज्यभर सांस्कृतिक कार्यक्रमांचे आयोजन करण्यात येईल. महाराष्ट्राची कला व संस्कती आणि परंपरेचे दर्शन या कार्यक्रमांतून घडेल. हे कार्यक्रम फक्त महाराष्ट्रातच नाहीतर महाराष्ट्राबाहेर ज्या ठिकाणी मराठी बांधव मोठ्या प्रमाणात आहेत त्या ठिकाणीही करण्यात ये्ईल. तसेच मराठी भाषिक बहुल भारताबाहेरील काही देशामध्ये सांस्कृतिक कार्यक्रमांचे आयोजन करण्यात येईल.
- व्याख्यानमाला, अध्यात्म नाट्यरंग महोत्सवाचे आयोजन
- राज्यातील महत्वाची मंदिरे आणि सर्वजनिक गणेशोत्सवाचे देखावे यांचे ऑनलाइन दर्शन घरबसल्या यावे यासाठी एक पोर्टल निर्माण करण्यात येईल
- उत्कृष्ट सार्वजनिक गणेश मंडळ अंतर्गत तालुका स्तरावर स्पर्धेद्वरे विविध पारितोषिके देण्यात येतील.
- घरगुती गणेशोत्सव आणि सार्वजनिक गणेशोत्सवाचे फोटो व्हिडिओ क्लिप्स पोर्टलवर येण्यासाठी एक प्लॅटफॉर्म विकसित करण्यात येईल
- ज्या चित्रपटांमधून गणपती विषयक परंपरा, कला संकृती दर्शिवलेली आहे अशा चित्रपटांचा विशेष गौरव करण्यात येईल
- गणेशोत्सवावर आधारित टपाल तिकीट आणि नाणे काढण्यात येईल
- संपूर्ण राज्याभरातून गणपतीविषयक रिल्स स्पर्धा आयोजित करण्यात येईल
- ड्रोनशोचे आयोजन करणार
- या राज्य महोत्सवाची माहिती संपूर्ण देशाभर व्हावी यासाठी वृत्तपत्रे वृत्तवाहिन्या रेडिओ आणि समाज माध्यमे यांच्या माध्यमातून देशभरात प्रचार प्रसिद्धी करणार
- आंतरराष्ट्रीय व आंतरराज्यीय पर्यटकांना आकर्षित करण्यासाठी विशेष कार्यक्रम उपक्रम हाती घेणार
- उत्सवाच्या दरम्यान प्रमुख ठिकाणी विद्युत रोषणाई व सुशोभिकरण करणार
- पारंपारिक भजन व आरती सादर करणाऱ्या भजनी मंडळांना साहित्य वाटप अनुदान देणार
- राज्यस्तरीय भजन स्पर्धेचे आयोजन
- विर्सजन सोहळयामध्ये आंतरराज्यीय व आंतरराष्ट्रीय पर्यटकांसाठी विविध सोयी सुविधा व वाहन व्यवस्था उपलब्ध करणार
- राज्यात शिकत असणाऱ्या देशाबाहेरील विद्यार्थ्याना या महोत्सवात सहभागी होण्यासाठी योजना, उपक्रम राबविणार