मुंबईतील शिक्षण विभाग वाऱ्यावर कार्यालयातील अर्ध्याहून अधिक जागा रिक्त शाळा संस्थाचालक मुख्याध्यापक शिक्षक शिक्षकेतरांचे प्रश्न प्रलंबित तातडीने रिक्त जागा न भरल्यास आंदोलन

कल्याण , मुंबईतील शिक्षण निरीक्षक उत्तर पश्चिम व दक्षिण विभाग कार्यालयामध्ये महत्त्वाच्या समजल्या जाणाऱ्या शिक्षण उपनिरीक्षक, सहाय्यक शिक्षण उपनिरीक्षक, अधीक्षक यांच्यासह वरिष्ठ लिपिक, कनिष्ठ लिपिक, समादेशक तसेच शिपायांच्या अर्ध्याहून अधिक जागा रिक्त असल्याने मुंबईतील संस्थाचालक मुख्याध्यापक शिक्षक व विद्यार्थ्यांचे अनेक प्रश्न तसेच शासकीय योजनांचा बोजवारा उडाल्याने या जागा तातडीने भरण्यात याव्या अशी मागणी भाजपा प्रदेश कार्यकारणी निमंत्रित सदस्य व मुंबई मुख्याध्यापक संघटना उत्तर विभागाचे अध्यक्ष अनिल बोरनारे यांनी शिक्षणमंत्री दादा भुसे यांच्याकडे केली आहे.

मुंबईतील उत्तर विभागामध्ये ५२७ पश्चिम विभागात ७८३ तर दक्षिण विभागात ४१८ अशा एकूण १७२८ शाळा आहेत. शिक्षण निरीक्षक उत्तर विभागात शिक्षण उपनिरीक्षकाच्या सहापैकी चार पद रिक्त आहेत, सहाय्यक शिक्षण उपनिरीक्षकाच्या सात पैकी पाच पदे रिक्त आहेत. अधीक्षकाची दोन पैकी दोन्ही पद रिक्त आहेत. कनिष्ठ लिपिकांमध्ये १४ पैकी सात पद रिक्त आहे. शिपायांमध्ये आठ पैकी सहा पदे रिक्त आहेत .‌

शिक्षण निरीक्षक पश्चिम विभागात शिक्षण उपनिरीक्षकाच्या सहापैकी चार जागा रिक्त आहे. सहाय्यक शिक्षण उपनिरीक्षकाच्या सहापैकी पाच जागा रिक्त आहेत. वरिष्ठ लिपिकाच्या बारापैकी सात जागा रिक्त आहेत .कनिष्ठ लिपिकाच्या १६ पैकी नऊ जागा रिक्त आहेत. शिपाई पदाच्या दहा पैकी नऊ जागा रिक्त आहे. तर दक्षिण विभागात शिक्षण उपनिरीक्षकाच्या पाच पैकी चार जागा रिक्त आहेत. सहाय्यक शिक्षण उपनिरीक्षकाच्या पाच पैकी चार जागा रिक्त आहेत . अधीक्षकाच्या दोन पैकी दोन जागा रिक्त आहेत. वरिष्ठ लिपिकाच्या १० पैकी पाच जागा रिक्त आहेत. कनिष्ठ लिपिकाच्या १५ पैकी दहा जागा रिक्त आहेत.‌ यातील तिन्ही शिक्षण निरीक्षक कार्यालयातील कार्यरत असलेले काही लिपिक मंत्रालयात तर काही शिक्षण उपसंचालक कार्यालयात काम करत असल्याने या तिन्ही कार्यालयाचा बोजवारा उडाल्याचे चित्र आहे.‌

या रिक्त पदांमुळे शिक्षकांची पीएफ, वैद्यकीय प्रतिपूर्ती, पदोन्नती यासह अनेक कामे ठप्प झालेली असल्याने शिक्षकांना वारंवार निरीक्षक कार्यालयाच्या पायऱ्या झीजवाव्या लागून शिक्षकांना मनस्ताप सहन करावा लागत आहे. महाराष्ट्र लोकसेवा हक्क कायद्यांतर्गत अधिसूचित सेवेची नियम काल मर्यादा शिक्षण निरीक्षक कार्यालयांना लागू असून यामध्ये शिक्षक शिक्षकेतरांचे वैयक्तिक मान्यता आदेश तीस दिवस, मुख्याध्यापक, उपमुख्याध्यापक ,पर्यवेक्षक वरिष्ठ लिपीक ,मुख्य लिपीक यांच्या पदोन्नती मान्यता पंधरा दिवस, वैद्यकीय खर्चाच्या देयकांची प्रतिपूर्ती सात दिवस, वरिष्ठ व निवड श्रेणी मंजुरी आदेश पंधरा दिवस, खाजगी शाळांमधील शिक्षकांची विनाअनुदानित वरून अनुदानित पदावर बदलीस मान्यता ३० दिवस, शिक्षक शिक्षकेतरांचे समायोजन पंधरा दिवस, प्रभारी मुख्याध्यापक मान्यता सात दिवस, नवीन शाळा दर्जा वाढ यांचे प्रस्ताव विभागीय शिक्षण उपसंचालकांना पाठवणे ३० दिवस, आर टी ई नमुना दोन मध्ये शाळा मान्यता देणे पंधरा दिवस, बोर्डाची मान्यता मंडळ सांकेतांक प्रस्ताव शिक्षण उपसंचालक कार्यालयाला पाठवणे २१ दिवस, शाळेतील नावातील बदलांची नोंद घेणे पंधरा दिवस, विद्यार्थ्यांच्या शाळा सोडल्याच्या दाखल्यावर प्रति स्वाक्षरी देणे एक दिवस, विद्यार्थ्यांची जात जन्मतारीख नाव यामध्ये बदल करणे सात दिवस,

पाचवी व आठवी शिष्यवृत्ती योजनेच्या लाभार्थ्यांची माहिती संकेतस्थळावर अद्ययावत करणे ३० दिवस या काल मर्यादेत काम करणे नियमाने बंधनकारक आहे तथापि कर्मचाऱ्यांच्या मोठ्या प्रमाणावर असलेल्या रिक्त जागांमुळे संस्थाचालक मुख्याध्यापक, शिक्षक शिक्षकेतर व विद्यार्थ्यांचे अनेक प्रश्न प्रलंबित असल्याचे अनिल बोरनारे यांनी सांगितले.